Endi o‘zbekistonlik talabalar Google Gemini AI Plus’dan bepul foydalanishi mumkin
O‘zbekistonlik talabalar SheerID orqali talabaligini tasdiqlab, 60 dollarlik Google Gemini AI Plus obunasidan bir yil bepul foydalanishi mumkin. Bu haqda Oliy ta’lim, fan va innovatsiyalar vazirligi xabar berdi.
Bepul obunadan foydalanish uchun talabalar aileaders.uz platformasida Google verifikatsiyasidan o‘tishi kerak. O‘zbekiston SheerID tomonidan talabalikni tasdiqlash mumkin bo‘lgan davlatlar ro‘yxatiga kiritilgan.
Google Gemini AI Plus obunasi Gemini ilovasidan foydalanish limitlarini ikki barobar oshiradi va ilg‘or Flash Thinking modelidan foydalanish imkonini beradi. Shuningdek, Google Foto, Disk va Gmail uchun jami 400 GB bulutli xotira, Google Flow xizmatiga qo‘shimcha kirish hamda Gmail ichida Gemini’dan foydalanish imkoniyati taqdim etiladi.
Obuna doirasida talabalar Gemini Notebook’ning tadqiqotga yordam beruvchi funksiyalaridan, jumladan, audio va videolarni qayta hikoya qilish hamda testlar ishlash imkoniyatidan foydalanishi mumkin. Sun’iy intellekt asosidagi musiqiy studiyaga ham qo‘shimcha kirish beriladi.
Bundan tashqari, talabalar aileaders.uz platformasida xalqaro kompaniyalarning sun’iy intellekt bo‘yicha 100 dan ortiq kursini bepul o‘rganishi mumkin. O‘z startap loyihalarini boshlashni istaganlar uchun startupbase.uz platformasi ham tavsiya etilgan.
