Chiroqchida YPX xodimi bilan suhbatini Instagram’ga joylagan fuqaro 7 sutkaga qamaldi
Qashqadaryo viloyati Yo‘l harakati xavfsizligi boshqarmasi xabariga ko‘ra, hodisa dehqon bozori atroflarida o‘tkazilgan reyd tadbirlari davomida yuz bergan.
Inspektorlar tomonidan to‘xtatilib tekshirilgan fuqaro jarayonni tasvirga olgan hamda videoni o‘zining Instagram sahifasiga joylashtirgan. Keyinchalik u ushbu qilmishidan pushaymonligini bildirib, ijtimoiy tarmoqlar orqali uzr so‘ragan va bunday holat qayta takrorlanmasligini ma’lum qilgan.
Shunga qaramay, jinoyat ishlari bo‘yicha Chiroqchi tuman sudi fuqaroning xatti-harakatlariga huquqiy baho berib, uni aybdor deb topdi. Sud qaroriga ko‘ra, u huquqni muhofaza qiluvchi organ xodimini obro‘sizlantirish maqsadida tasvirga olib tarqatganlikda ayblangan.
Huquqbuzarga Ma’muriy javobgarlik to‘g‘risidagi kodeksning tegishli moddasiga asosan 7 sutkalik ma’muriy qamoq jazosi tayinlandi. Bu kabi choralar organ xodimlarining xizmat vazifasini bajarish chog‘ida ularning obro‘yiga putur yetkazilishining oldini olishga qaratilgani da’vo qilinadi.
