Bo‘stonliqda tadbirkor 586 tup daraxtni noqonuniy qo‘porib, tabiatga 1,7 milliard so‘m zarar yetkazdi
“G‘azalkent” mahalla fuqarolar yig‘ini hududidagi 2 gektar maydonda mas’uliyati cheklangan jamiyati tomonidan 586 tup har xil turdagi daraxtlar ildizi bilan noqonuniy ravishda qo‘porib tashlangani aniqlandi.
Ijtimoiy tarmoqlardagi xabarlardan so‘ng Ekologiya boshqarmasi hamda Ekopolitsiya xodimlari ishtirokida maxsus reyd o‘tkazildi.
Ma’lum bo‘lishicha, hududdagi do‘lana, archa, tog‘ olchasi va uchqat daraxtlari maxsus texnika yordamida tuproq ostiga ko‘mib yuborilgan. Tadbirkor avvalroq berilgan ogohlantirishlarga bo‘ysunmay, vakolatli idoralar xodimlariga qarshilik ko‘rsatishga ham uringan.
Ekopolitsiya aralashuvi bilan noqonuniy harakatlarga chek qo‘yildi va tuproq ostida qolgan daraxtlar birma-bir chiqarib olindi. Mutaxassislarning hisob-kitoblariga ko‘ra, yetkazilgan umumiy moddiy zarar miqdori 1 milliard 705 million 660 ming so‘mni tashkil etgan.
Hozirgi vaqtda to‘plangan barcha hujjatlar va dalillar tadbirkorga nisbatan huquqiy baho berish hamda tegishli qonuniy choralar ko‘rish maqsadida huquqni muhofaza qiluvchi organlarga topshirildi.
