“Bo‘sh vaqti umuman bo‘lmaydi”: FVV navbatchi guruhlari yong‘insiz kunlari nima bilan shug‘ullanadi?
13-oktyabr kuni Prezident Administratsiyasi huzuridagi OAV uchun kontent tayyorlash markazida Favqulodda vaziyatlar vazirligining matbuot anjumani bo‘lib o‘tdi. Unda tabiiy ofatlar xavfini kamaytirish, favqulodda vaziyatlarning oldini olish va kuz-qish mavsumiga tayyorgarlik muhokama qilindi. Podpolkovnik Odiljon Qo‘ldoshev, yong‘in bo‘lmagan kun navbatchi guruh nimalar qilishi haqida aytib o’tdi.
Vazirlik ma’lumotiga ko‘ra, 2026-yilning 9 oyida respublikada 41 ta favqulodda vaziyat qayd etilgan. Bu o‘tgan yilning shu davridagi 61 ta holatga nisbatan 33 foizga kam. Shu bilan birga, yong‘inlarning 72,3 foizi aholi yashash joylarida sodir bo‘lmoqda. Is gazidan zaharlanish, gaz-havo aralashmasining chaqnashi va yirik yong‘inlar ham aynan kuz-qishda ko‘payadi.
Qo‘ldoshevning aytilishicha, respublikadagi 9 mingga yaqin mahallaning har biri vazirlik shaxsiy tarkibiga biriktirilgan. Taqsimot ko‘chama-ko‘cha va ko‘p qavatli uy kesimida qilingan. Har bir xodimga bir yoki ikkita mahalla to‘g‘ri keladi. Kuz-qish oldidan shu hududlarda xonadonbay va mahallabay profilaktik tushuntirish o‘tkaziladi. Hozircha bu ishlar maxsus qayd etish jurnalida ro‘yxatdan o‘tadi. Tizim raqamlashtirish bosqichida. To‘liq raqamli hisobga o‘tishi keyingi vazifa sifatida aytilgan.
Is gazining oldini olish ham shu tartibda ketmoqda. Qo‘ldoshevning so‘zlariga ko‘ra, avval mingga yaqin bo‘lgan inspektorlar endi 2 mingdan ortiq. Ular mahallalarga tushirilgan. Mahallabay va xonadonbay profilaktika reja asosida o‘tkazilmoqda.
2026-2027 yilgi mavsumga tayyorgarlik doirasida ishchi guruhlar 20 mingdan ortiq ko‘p qavatli uy, ulardagi 900 mingga yaqin xonadan va 1 519 459 ta yakka tartibdagi xonadonlarni tekshirgan. Gaz va elektr jihozlari, pechlar, dudburonlar hamda shamollatish kanallari ko‘zdan kechirilgan. 607 626 ta qoidabuzarlik aniqlangan. Ulardan 536 606 tasi, ya’ni 88,3 foizi, ta’mirlash-tiklash otryadlari tomonidan bartaraf etilgan. Qolgan qismi hali yopilmagan.
Ijtimoiy soha obyektlarida ham kamchiliklar topilgan: 10 945 ta maktabgacha va maktab ta’limi tashkiloti, 353 ta oliy ta’lim muassasasi va 3 441 ta davolash muassasasi tekshirilgan. Bu obyektlarda 137 071 ta kamchilik aniqlangan, shundan 122 676 tasi, ya’ni 89,5 foizi, bartaraf etilgan.
Is gazi va yong‘inlarning oldini olish yuzasidan 289 turdagi eslatma, yo‘riqnoma va plakat 2 128 541 nusxada tarqatilgan. 456 310 marta uchrashuv va seminar o‘tkazilib, ularda 2 millionga yaqin fuqaro qamrab olingan. Telekanallarda 5 266 ta ko‘rsatuv va lavha, radioda 26 564 ta eshittirish tayyorlangan, gazetalarda 2 129 ta maqola chop etilgan.
Yozgi anjumanda inspektorlarni mahallaga biriktirish va “mahallabay”, “xonadonbay” ishlash tizimi joriy etilgani aytilgan edi. Oktyabr anjumanida shu tartib navbatchi smenaning kundalik ishi sifatida ko‘rsatildi
