Bill Geyts sun’iy intellekt bir milliard odamning o‘limiga olib kelishi mumkinligidan ogohlantirdi
Uning ta’kidlashicha, ushbu texnologiya favqulodda katta quvvatga ega va noto‘g‘ri qo‘llarga tushgan taqdirda halokatli oqibatlarga olib kelishi mumkin.
“Sun’iy intellekt, shubhasiz, juda katta kuchga ega. U bir milliard odamning o‘limiga sabab bo‘ladigan jarayonlarni keltirib chiqarishga qodir. Yovuz niyatli kimsalar eng ilg‘or texnologiyalardan foydalana boshlasa, u misli ko‘rilmagan darajada xavfli qurolga aylanadi”, deydi milliarder.
Geyts, shuningdek, texnologiya kompaniyalarining o‘z-o‘zini tartibga solishi va ichki nazorati yetarli emasligini qayd etdi. Uning fikricha, sun’iy intellekt ustidan nazorat o‘rnatish jarayonida davlat organlari hamda hukumatlar bevosita va faol ravishda qatnashishi shart.
Shu munosabat bilan Microsoft asoschisi AQSH hukumatini sohaga oid qat’iy qonunlar qabul qilishga, huquqni muhofaza qiluvchi idoralar va siyosatchilarni xavfsizlik masalalariga jalb etishga chaqirdi.
“Xavfsizlikni ta’minlashga qaratilgan ushbu choralar va nazorat mexanizmlari soha uchun qo‘shimcha xarajatlarni talab qilishi mumkin, ammo ular IT-kompaniyalarning rivojlanishiga xalaqit bermaydi”, deya qo‘shimcha qildi u.
