AQSHda Tramp surati tushirilgan 1 dollarlik tanga muomalaga chiqarildi
AQSH zarbxonasi 1-sentabrdan boshlab yangi tangalarni muomalaga chiqarish va sotishni boshladi. Tanganing old tomonida Donald Tramp portreti, “LIBERTY” (Ozodlik) va “IN GOD WE TRUST” (Biz Xudoga ishonamiz) yozuvlari aks etgan. Orqa tomonida esa AQSH prezidenti muhri va uning qalqonida “250” raqami tasvirlangan.
Zarbxona yangi tangalarni mamlakatning 250 yillik yubileyiga bag‘ishlangan maxsus dizayn sifatida taqdim etmoqda. Tramp ma’muriyati bunga 1926-yilda AQSHning 150 yilligi munosabati bilan chiqarilgan, o‘sha paytdagi prezident Kalvin Kulij va Jorj Vashington tasvirlari tushirilgan tangani misol qilib keltirgan.
Yangi tangalarning nominal qiymati 1 dollar bo‘lsa-da, ular yuqoriroq narxda sotilmoqda. Xususan, 25 donalik o‘ram 61 dollar, 100 donalik to‘plam esa 154,5 dollar turadi. Shu bilan birga, tangalar qonuniy to‘lov vositasi hisoblanadi va oddiy 1 dollarlik banknota kabi xaridlar uchun ishlatilishi mumkin.
AQSH qonunchiligida odatda mamlakat pul birliklarida faqat vafot etgan shaxslarning portretlarini aks ettirish nazarda tutilgan. Biroq 2020-yilda qabul qilingan qonun G‘aznachilik vazirligiga AQSHning 250 yilligiga bag‘ishlangan maxsus 1 dollarlik tangalarni chiqarish vakolatini bergan. Undagi cheklov tanga orqa tomonida tirik yoki vafot etgan shaxs portretini joylashtirishni taqiqlaydi. Tramp surati esa old tomonga tushirilgan.
Tashabbus AQSHda tanqidlarga ham sabab bo‘ldi. Demokrat senatorlar Ketrin Kortez Masto va Jeff Merkli Trampning tasvirini tangaga joylashtirishni taqiqlashga qaratilgan qonun loyihasini ilgari surgan, biroq u qabul qilinmagan. Kortez Masto yangi tangani “Amerikaning demokratik qadriyatlariga mutlaqo zid” deb atadi.
