AQSH va Markaziy Osiyo kritik minerallar bo‘yicha yangi kelishuvlarga tayyorlanmoqda
9-sentyabr kuni bo‘lib o‘tgan maslahatlashuvlarda O‘zbekiston, Qozog‘iston, Qirg‘iziston, Tojikiston, Turkmaniston hamda AQSH rasmiylari ishtirok etdi. Tomonlar ilgari erishilgan bitimlar ijrosi, ko‘p tomonlama hamkorlikni rivojlantirish va kutilayotgan oliy darajadagi tadbirlarga tayyorgarlik ko‘rish masalalarini muhokama qildi. Garchi yig‘ilish yakunida muayyan shartnomalar e’lon qilinmagan bo‘lsa-da, uchrashuv strategik zaxiralar bo‘yicha muloqot mantiqiy davom etayotganini ko‘rsatgan.
Mintaqadagi nodir elementlar va strategik xomashyo zaxiralarini o‘zlashtirish Vashington va Markaziy Osiyo iqtisodiy munosabatlarida asosiy ustuvor yo‘nalishga aylanmoqda. O‘zbekiston ham ushbu jarayonda faol ishtirok etib, AQSH bilan kritik minerallarni qazib olish, ularni ekologik talablar asosida chuqur qayta ishlash hamda shaffof ta’minot zanjirlarini barpo etish yo‘nalishida ikki tomonlama kelishuvlarni amalga oshirib kelmoqda.
Shuningdek, rasmiy Toshkent ushbu sohada faqat xomashyo yetkazib berish bilan cheklanib qolmasdan, yuqori qo‘shilgan qiymatga ega tayyor mahsulotlar ishlab chiqarish va sanoat klasterlarini tashkil etish tarafdori hisoblanadi. Shu maqsadda mintaqa davlatlari va AQSH o‘rtasida geologiya-qidiruv hamda texnologiyalar transferi bo‘yicha qo‘shma loyihalarni muvofiqlashtirib borish rejalashtirilgan.
