Abdulaziz Abdurahmonovning osmonda qurgan imperiyasi. Centrum Holding qanday dunyoga keldi?
Bugungi kunda Centrum Holding O‘zbekistonning havo yuk tashish bozorining 40 foizidan ko‘prog‘ini va ichki yo‘lovchi aviatsiyasining 30 foiziga yaqinini nazorat qiladi. Atigi 7 yil ichida noldan qurilgan bu imperiya bugun Markaziy Osiyoning eng yirik xususiy transport va logistika guruhiga aylandi.
Abdulaziz Abdurahmonov ilgari O‘zbekiston Airways aviakompaniyasida biznes aviatsiya va yuk tashish bo‘yicha charter reyslar boshlig‘i lavozimida ishlagan. Bu tajriba uning kelajakdagi biznesining poydevori bo‘ldi. U O‘zbekiston aviatsiya sohasining ichki tizimini, qonunchiligini va bozor imkoniyatlarini chuqur o‘rgandi. 20 yillik tajriba esa uni soha ekspertiga aylantirdi.
My Freighter Airlines 2019-yilda Toshkentda tashkil etilgan xususiy yuk aviakompaniyasi. 2022-yil 23-oktyabrda kompaniya o‘zining birinchi samolyoti – Boeing 747-200ni sotib oldi va O‘zbekistonda ro‘yxatdan o‘tgan birinchi Boeing 747 yuk tashuvchisiga aylandi. Abdurahmonov Centrum Holdings asoschisi va bosh ijrochi direktori sifatida 2020-yil yanvarda O‘zbekistonga asoslangan yuk aviakompaniyasini ishga tushirdi.
My Freighter 2026-yil oxirigacha o‘z flotini 30-50 samolyotga yetkazishni rejalashtirmoqda. 20 yildan ortiq aviatsiya va logistika sohasidagi tajribasi bilan Abdurahmonov yirik ta’sirchan yuk tashish va transport bizneslarini qurish va kengaytirish bo‘yicha tanilgan tadbirkor sifatida tan olingan. U Centrum Holding ostidagi global kompaniyalar tarmog‘ini boshqaradi – O‘zbekiston, Janubiy Koreya, Singapur, Xitoy, Yevropa Ittifoqi, Saudiya Arabistoni va BAA kabi asosiy xalqaro markazlarda ishlaydi.
Centrum Air 2023-yil 18-yanvarda tashkil etilgan O‘zbekistonga asoslangan xususiy gibrid aviakompaniya. Kompaniya Toshkentda joylashgan bo‘lib, hozirda 50 dan ortiq yo‘nalishda parvozlar amalga oshirmoqda. Centrum Air qisqa vaqt ichida O‘zbekistonning yirik xususiy aviakompaniyasiga aylandi. Floti Airbus A320 va A321 samolyotlaridan iborat.
Centrum Air O‘zbekistonning iqtidorli yoshlarini qo‘llab-quvvatlashni davom ettirmoqda – Farg‘onalik Dilafruz Sobirova Harvard universitetining Biologiya fakultetiga qabul qilinganida unga havo sayohat yordami ko‘rsatdi. Kompaniya nufuzli Harvard universitetining biologiya fakultetiga o‘qishga kirgan farg‘onalik Dilafruz Sobirovani butun o‘qish davri davomida yiliga ikki marta aviachiptalar bilan ta’minlaydi.
Bundan tashqari Centrum Holding samolyotlaridan birini Amir Temur nomi bilan atashga qaror qilishi bilan ham jamoatchilik e’tiboriga tushdi.
“Aviatsiya shaharlar va davlatlarni bog‘laydi – xuddi tariximizdagi ulug‘ shaxslar madaniyatlarni birlashtirib, savdoni rivojlantirgani va xalqlar do‘stligini mustahkamlagani kabi. Havo kemalarimizdan biriga Amir Temur nomini berish o‘tmishimizga bo‘lgan yuksak ehtirom hamda insonlarni bir-biriga yaqinlashtirish borasidagi ezgu missiyamiz ramzidir”, degan Abdurahmonov.
O‘zbekiston Respublikasi Prezidenti Shavkat Mirziyoyev Centrum Holding asoschisi va bosh ijrochi direktori Abdulaziz Abdurahmonovni O‘zbekiston aviatsiyasi va logistika sohasini rivojlantirishga, xalqaro aloqadorlikka va iqtisodiyotga qo‘shgan hissasi uchun "Do‘stlik" ordeni bilan taqdirladi.
Centrum Holding AQSh elchixonasi delegatsiyasi bilan uchrashuv o‘tkazdi. Tomonlar Embry-Riddle Aeronautical University (Florida, AQSh) bilan hamkorlikda O‘zbekistonda aviatsiya universiteti tashkil etish rejalarini muhokama qildi. Loyiha xalqaro standartlarga muvofiq pilot va muhandis-texnik mutaxassislarni tayyorlashni kuchaytirish, shuningdek mintaqaviy aviatsiya sanoati uchun professional kadrlar zaxirasini rivojlantirishga qaratilgan.
“Biz aviatsiya, logistika, ta’lim va investitsiyalar sohasida AQSh kompaniyalari bilan hamkorlikni chuqurlashtirishda kuchli salohiyat ko‘rmoqdamiz”, dedi Abdurahmonov.
Centrum Holding O‘zbekistonning eng yirik ichki logistika terminalini – Toshkentdan taxminan 100 kilometr uzoqlikda – allaqachon ishga tushirgan. Poytaxtning yangi xalqaro aeroporti yaqinida esa yangi logistika majmuasi qurilmoqda.
Kengayish strategiyasi doirasida Centrum Holding O‘rta Yo‘l (Trans-Kaspiy Xalqaro Transport Yo‘nalishi) bo‘ylab ko‘p tarmoqli yuk terminallarini kengaytirish, temir yo‘l vagonlari va yuk mashinalar flotini oshirish va Kaspiy dengizida parom yuk tashishni rivojlantirishni maqsad qilgan.
Yirik xususiy o‘zbek logistika guruhi Centrum Holding keyingi bir-ikki yil ichida birjaga chiqishga (IPO) tayyorlanmoqda. Kompaniya birlamchi taklif uchun asosiy maydon sifatida London fond birjasini (LSE) ko‘rib chiqmoqda.
“Biz keyingi bir-ikki yil ichida IPOga tayyor bo'lishni maqsad qilganmiz. Biz buni asosan biznesni kengaytirishga yordam bera oladigan investorlarni jalb qilish imkoniyati sifatida ko'rmoqdamiz”, dedi Abdurahmonov Bloomberg bilan suhbatida.
Abdulaziz Abdurahmonov shaxsi O‘zbekiston tadbirkorligining yangi avlodini ifodalaydi. O‘zbekiston Airways da charter reyslar boshlig‘i bo‘lgan oddiy mutaxassis, bugun Londonda IPO o‘tkazishga tayyorlanayotgan $1 milliardlik konglomerat rahbari.
Ochiq manbalar asosida Abdurahmon Ergashev tayyorladi
