Tatariston raisi O‘zbekiston prezidentiga hamdardlik telegrammasi yo‘lladi
Tatariston raisi Rustam Minnixanov Ukrainaning Nijnekamsk shahriga uyushtirgan dron hujumi oqibatida O‘zbekiston va Tojikiston fuqarolari halok bo‘lgani munosabati bilan Shavkat Mirziyoyev va Emomali Rahmonga hamdardlik bildirdi. Bu haqda TASS xabar qildi.
“Rustam Minnixanov O‘zbekiston va Tojikiston prezidentlariga hamdardlik telegrammalarini yo‘lladi. Ularning fuqarolari xostelda halok bo‘lganlar orasida bo‘lgan, jami 9 kishi vafot etgan”, — deyiladi matbuot xizmati xabarida.
Hujum oqibatida bir nafar Tojikiston va sakkiz nafar O‘zbekiston fuqarosi halok bo‘lgan. Minnixanov o‘z telegrammalarida halok bo‘lganlar va jabrlanganlarning oilalariga barcha zarur yordam ko‘rsatilishini ta’kidlagan.
“Qaytarib bo‘lmas judolik dardini baham ko‘ramiz. Ushbu dahshatli terakt qurbonlarining oilalari bilan birgamiz. Ularga jasorat, ruhiy kuch va matonat, barcha jabrlanganlarga esa tezroq sog‘ayib ketishlarini tilayman”, — deb yozgan Minnixanov.
Eslatib o‘tamiz, kecha,10-avgust kuni NIjnekamsk shahri dron hujumiga uchradi. Zarba oqibatida 13 kishi vafot etdi, halok bo‘lganlar orasida O‘zbekiston va Tojikiston fuqarolari bor.
Kecha, O‘zbekiston FVV matbuot xizmatining xabar berishicha, halok bo‘lgan O'zbekiston fuqarolarining soni 8 nafarga yetgan. Shundan so‘ng prezident Shavkat Mirziyoyev topshirig‘i bilan bosh vazir o‘rinbosari Achilbay Ramatov rahbarligida hukumat komissiyasi tuzildi. Uning tarkibiga qator vazirlik va idoralar rahbarlari kiritilgan.
Hukumat komissiyasiga jabrlangan fuqarolarga zarur yordam ko‘rsatish, halok bo‘lganlarning jasadlarini O‘zbekistonga olib kelish va ularning oilalariga har tomonlama ko‘mak berish vazifalari yuklatilgan.
Halok bo‘lgan orasida bir nafar bir bola ham bo‘lgan. 70 dan ortiq kishi yordam so‘rab murojaat qilgan, 21 kishi shifoxonaga yotqizilgan.
Tatariston hukumati halok bo‘lganlar yodiga 10-avgustni motam kuni deya e’lon qildi.
