Zaynilobiddin Nizomiddinov Sirdaryo viloyati hokimi vazifasini bajaruvchi etib tayinlandi
Zaynilobiddin Nizomiddinov Sirdaryo viloyati hokimi vazifasini bajaruvchi etib tayinlandi. Bu haqda O‘zA xabar qildi.
Bungacha u 2025-yil aprelidan buyon Toshkent viloyatining Bekobod tumani hokimi bo‘lib ishlagan. Yangi tayinlov munosabati bilan egallab turgan lavozimidan ozod etilgan.
Nizomiddinov 1974-yil 27-mayda Surxondaryo viloyatining Sariosiyo tumanida tug‘ilgan. 1996-yilda Toshkent davlat iqtisodiyot universitetini iqtisodchi mutaxassisligi bo‘yicha tamomlagan va mehnat faoliyatini o‘sha yili Tashqi iqtisodiy aloqalar vazirligida boshlagan.
U 2016–2018-yillarda prezident maslahatchisi — ijro etuvchi apparati rahbari, 2018–2022-yillarda Prezident Administratsiyasi rahbari lavozimlarida ishlagan. 2022-yilda ushbu lavozimdan ozod etilib, keyinchalik O‘zbekiston kasaba uyushmalari federatsiyasi raisining birinchi o‘rinbosari etib saylangan.
Sirdaryo viloyatining avvalgi hokimi Erkinjon Turdimov 9-oktabr kuni bosh vazirning birinchi o‘rinbosari — ta’lim va ilm-fan vaziri etib tayinlangandi.
