Yarim yilda O‘zbekiston iqtisodiyotiga qariyb 339 trillion so‘m investitsiya kiritildi
Milliy statistika qo‘mitasi ma’lum qiladiki, eng ko‘p sarmoya ishlab chiqarish sanoatiga yo‘naltirilib, 100,5 trillion so‘mni tashkil etdi. Shuningdek, qishloq, o‘rmon va baliqchilik xo‘jaligiga 32,9 trillion so‘m, qurilish sohasiga 32,5 trillion so‘m hamda energetika va gaz ta’minotiga 29,9 trillion so‘m investitsiya kiritildi.
Aholini uy-joy bilan ta’minlash va infratuzilmaga ham yirik mablag‘lar ajratildi: turar joy qurilishiga 27,3 trillion, tog‘-kon sanoatiga 21,8 trillion, transport va saqlashga 16,3 trillion hamda savdo va servis yo‘nalishiga 13,7 trillion so‘m yo‘naltirildi. Suv va chiqindilarni qayta ishlashga 7,4 trillion, ta’limga 7,2 trillion, IT va aloqaga 5,8 trillion, ovqatlanish va joylashtirish xizmatlariga 5,6 trillion so‘m sarflandi.
Sog‘liqni saqlash, ilm-fan, moliya va madaniyat sohalari bo‘yicha esa jami 13,6 trillion so‘mdan ziyod sarmoya o‘zlashtirilgan. Ko‘rsatkichlar iqtisodiyotda asosiy urg‘u qayta ishlash sanoati va energetikaga qaratilayotganini ko‘rsatmoqda.
