Xudoyorxon o‘rdasida ziyofat uyushtirib, tadbir o‘tkazgan muzey direktori hayfsan oldi
Ijtimoiy tarmoqlarda Qo‘qon shahridagi Xudoyorxon o‘rdasi hovlisida ko‘ngilochar tadbir o‘tkazilgani aks etgan videolar tarqaldi. Tasvirlarda bir guruh ayolarning raqsga tushayotgani ko‘rinadi. Mazkur holat yuzasidan Madaniy meros agentligi tomonidan o‘rganish ishlari olib borilib, “Qo‘qon” davlat muzey-qo‘riqxonasi direktori M. Mavlonqulovga chora ko‘rildi.
Ma’lumotlarga ko‘ra, holat 3-oktabr kuni Qo‘qon shahrida joylashgan Xudoyorxon o‘rdasida “A club” nomi ostida bir guruh ayollar ishtirokida “Chopon party” tadbiri o‘tkazilgan. Tadbir “Qo‘qon” davlat muzey-qo‘riqxonasi rahbariyati tomonidan Madaniy meros agentligi bilan belgilangan tartibda kelishilmagan holda tashkil etilgan.
Madaniy meros agentligining 2024-yilda qabul qilingan tegishli buyrug‘i talablariga muvofiq, davlat muzeylari va muzey-qo‘riqxonalarida o‘tkazilishi rejalashtirilayotgan madaniy-ma’rifiy, ommaviy va boshqa tadbirlar belgilangan tartibda Agentlik bilan kelishilishi lozimligi belgilab qo‘yilgan.
Yuqoridagi holat yuzasidan “Qo‘qon” davlat muzey-qo‘riqxonasi direktori M. Mavlonqulovga madaniy meros obyektlarining saqlanishi, ulardan belgilangan tartibda foydalanilishi hamda qonunchilik talablariga rioya etilishi borasidagi xizmat vazifalarini lozim darajada bajarmaganligi sababli Mehnat kodeksining 312-moddasiga asosan “hayfsan” intizomiy jazo chorasi qo‘llanilgan.
Madaniy meros agentligi tomonidan ushbu holat yuzasidan tegishli choralar ko‘rilib, kelgusida madaniy meros obyektlari va muzey-qo‘riqxonalar hududida tadbirlarni belgilangan tartib va talablarga muvofiq tashkil etish bo‘yicha nazorat choralari kuchaytiriladi.
