Toshkent metrosida ikki oyda 61 milliondan ortiq yo‘lovchi tashildi

Toshkentda yo’lovchilar oqimi ortgani sababli joriy yilning sentabr–oktabr oylarida metrodan 61,7 million nafar yo‘lovchi foydalangan. Bu haqda Toshkent metropoliten matbuot xizmati xabar qildi.
Metropoliten ma’lumotiga ko‘ra, hozirda metrodan kuniga 1,2 milliondan ortiq yo‘lovchi foydalanmoqda. Bu o‘tgan yilning mos davriga nisbatan 20 foizga ko‘p. 2027–2028-yillarda esa har biri beshta vagondan iborat 28 ta yangi poyezd xarid qilish rejalashtirilgan. Metropoliten ma’muriyati faqat poyezdlarning oldingi vagonlariga to‘planmasdan, o‘rta vagonlardan ham foydalanishni tavsiya qilmoqda. Bundan tashqari, imkon qadar gavjum bekatlarga muqobil bekatlarni tanlash taklif etilgan. Jumladan, “Chilonzor” o‘rniga “Mirzo Ulug‘bek”, “Xalqlar do‘stligi” o‘rniga esa “Milliy bog‘” bekatidan foydalanish mumkinligi bildirilgan.
Shuningdek, 3-noyabr kuni o’tkazilgan matbuot anjumanida Mirhusanov tig‘iz vaqtlarda Chilonzor yo‘nalishidagi poyezdlar oralig‘i bir yarim daqiqagacha qisqartirilganini bildirgan edi. Uning so‘zlariga ko‘ra, eng gavjum paytlarda ushbu yo‘nalishga 28 tagacha poyezd chiqariladi, mavjud texnik imkoniyatlar esa intervalni bundan ham qisqartirishga imkon bermaydi.
Bekatlardagi sharoitni yaxshilash bo‘yicha ham loyihalar muhokama qilinmoqda. Jumladan, yo‘lovchilar ko‘p to‘planadigan, ayniqsa, yo‘nalishlar o‘rtasida o‘tish joylari mavjud bekatlarga qo‘shimcha sovitish tizimlarini o‘rnatish imkoniyati o‘rganilmoqda. “Shahriston” bekati platformasida esa oynavand xavfsizlik to‘siqlarini o‘rnatish rejalashtirilgan. Ushbu loyiha hujjatlari ekspertizaga taqdim etilgan bo‘lib, ijobiy xulosa olinsa, o‘rnatish ishlarini 2027-yilda bajarish ko‘zda tutilgan.
Avvalroq, Toshkent metrosida farrosh oylik berilmayotganini aytib Saida Mirziyoyevadan yordam so‘ragani haqida xabar bergan edik.
- #Metro
- #Toshkent







