Xorijdagi o‘zbekistonlik futbolchilar: Shomurodov Yevrokuboklar bilan xayrlashdi, Hasanovda debyut gol, Husanov jamoa libosi taqdimotida
Shomurodovning “Istanbul Başakşehir”i yana Yevrokuboklar saralashidan o‘ta olmadi.
O‘zbekiston terma jamoasi hujumchisi Eldor Shomurodov to‘liq 90 daqiqa harakat qilgan uchrashuvda Turkiyaning "Istanbul Başakşehir" klubi UEFA Konferensiyalar ligasi 2-saralash bosqichi javob bahsida Finlyandiyaning "Inter Turku" jamoasiga 0:2 hisobida mag‘lub bo‘ldi.
Birinchi uchrashuv 1:1 hisobida yakunlangani bois ikki o‘yin natijasiga ko‘ra fin klubi 3:1 hisobida g‘alaba qozonib, keyingi bosqichga yo‘l oldi. Abbosbek Fayzullayev uchrashuvni zaxira o‘rindig‘ida o‘tkazdi va maydonga tushirilmadi.
Eslatib o‘tamiz, Shomurodov o‘tgan mavsum Turkiya Superligasida 22 ta gol urib, jamoaning eng yaxshi to‘purari bo‘lgandi. Shunga qaramay, "Başakşehir" ketma-ket ikkinchi mavsum Yevrokuboklar saralashidan o‘ta olmadi.
Sadriddin Hasanov Portugaliyada debyut golini urdi
O‘zbekistonlik yosh futbolchi Sadriddin Hasanov Portugaliyaning “Braga U-23” jamoasi safida ilk golini urdi. U mavsumoldi o‘rtoqlik uchrashuvida "Portu U-23" darvozasini jarima zarbasidan aniq nishonga olib, jamoasining eng chiroyli gollaridan biriga mualliflik qildi.
"Braga U-23" yangi mavsumni 11-avgust kuni "Farense U-23"ga qarshi uchrashuv bilan boshlaydi.
Abduqodir Husanov "Manchester Siti"ning yangi libosi taqdimotida
Angliyaning "Manchester Siti" klubi 2026/27-yilgi mavsum uchun mo‘ljallangan uchinchi libosini rasman taqdim etdi.
Gong Kongda o‘tkazilgan taqdimot marosimida O‘zbekiston terma jamoasi himoyachisi Abduqodir Husanov ham klubning asosiy futbolchilari qatorida ishtirok etdi. Taqdimotda, shuningdek, jamoa yetakchilaridan Fil Foden va McAidoo ham qatnashdi.
.jpg&w=3840&q=75)
