Vodiy yo‘nalishida Xitoyning yangi tezyurar poyezdi qatnovi yo‘lga qo‘yildi
Yangi poyezd poytaxt va Farg‘ona vodiysi o‘rtasida qatnov vaqtini qisqartirishga xizmat qiladi. Rejaga ko‘ra, 730-sonli poyezd Toshkentdan soat 09:20 da yo‘lga chiqib, Angren, Pop, Qo‘qon va Marg‘ilon shaharlari orqali soat 13:35 da Andijonga yetib boradi. Qaytish yo‘nalishidagi 729-sonli reys esa Andijondan soat 15:38 da jo‘nab, Toshkentga 19:53 da yetib keladi.
Xitoydan olib kelingan ushbu yangi elektropoyezd to‘rtta ekonom toifasidagi vagondan tashkil topgan bo‘lib, bir safarda jami 357 nafar yo‘lovchini tashish imkoniyatiga ega. Poyezd ichidagi sharoitlar va zamonaviy qulayliklar yo‘lovchilar uzog‘ini yaqin qilishga mo‘ljallangan.
Shuningdek, ushbu yangilanish munosabati bilan 9-15-sentyabr kunlaridan e’tiboran Farg‘ona vodiysi yo‘nalishida harakatlanuvchi boshqa qator poyezdlar jadvaliga ham o‘zgartirishlar kiritilmoqda. Xususan, Xiva, Urganch, Qo‘ng‘irot, Termiz hamda Namangan yo‘nalishlaridan Andijonga qatnovchi poyezdlar harakati yangilangan vaqtlar bo‘yicha amalga oshiriladi.
