“Urganch-Xiva” pulli yo‘lida qoidaga amal qilmay nohaq qarzdor hisoblangan haydovchilarning pullari qaytarib beriladi
Rasmiy kuchga kirgan ushbu hujjatga muvofiq, yo‘ldan foydalanish harakati boshlanishidan ilgari operator tariflar, to‘lov usullari va albatta muqobil bepul yo‘l haqidagi axborotni jamoatchilikka e’lon qilishi shart.
Yo‘ldan foydalanish uchun to‘lov miqdori transport vositasining toifasiga qarab operator tomonidan belgilanadi hamda bu summalar Transport vazirligi tasdiqlagan eng yuqori chegaradan oshib ketishi mumkin emas. Haydovchilar to‘lovlarni elektron hisob, maxsus punktlar yoki kechiktirilgan to‘lov tizimi orqali amalga oshirishlari mumkin bo‘ladi.
To‘siqsiz elektron tizimda kechiktirilgan to‘lov qo‘llanilganda, pul xabarnoma kelgan vaqtdan boshlab 5 ish kuni ichida to‘lanishi kerak.
Hujjatda iste’molchilar huquqlarini himoya qilish mexanizmlari ham nazarda tutilgan. Agarda qarzdorlik yoki to‘lov noto‘g‘ri hisoblangan bo‘lsa, haydovchi buni qayta ko‘rib chiqishni talab qilishi mumkin va shikoyat asosli deb topilsa, nohaq yozilgan qarzdorlik to‘liq bekor qilinadi. Operator harakatlaridan norozi bo‘lganlar Avtomobil yo‘llari qo‘mitasi yoki sudga murojaat qilish huquqiga ega.
Bundan tashqari, operator yo‘lning texnik holatiga to‘liq javobgar bo‘lib, avariya yoki nosozliklarda yordam ko‘rsatishi hamda yo‘ldagi kamchiliklar sabab avtomobillarga yetkazilgan zararni qoplab berishi shart qilib belgilandi. Mazkur vaqtinchalik nizom ushbu sohadagi Vazirlar Mahkamasining tegishli qarori kuchga kirguniga qadar amal qiladi.
