Chilonzorda yana o‘lik hayvonlar topildi (+foto)

Avvalroq Toshkent shahri Chilonzor tumani 26-dahasida hayvonlar ommaviy nobud bo‘layotgani haqida xabar bergan edik. Taxminlarga ko‘ra, bunga zaharlanish sabab bo‘lgan bo‘lishi mumkin.
Ijtimoiy tarmoqlarda Chilonzor tumanining boshqa hududlarida ham xuddi shunday holat yuz bergani haqida xabarlar tarqaldi. Bu safar tumanning 5- va 6-mavzelarida yashovchi aholi hududda o‘lgan qushlar va tipratikanlar topilganini ma’lum qilgan.

Hayvonlarning jasadlari ariqlardan topligan. O‘lgan tipratikanlardan biri bolalar bog‘chasi hududidan topilgan. Aholi 6-dahada ham bir nechta tipratikan o‘lgan holda aniqlangani xabar qilgan.
Telegramdagi “Animal life” kanalining yozishicha, 26-mavzeda hayvonlar ommaviy nobud bo‘layotgani haqidagi xabarlardan so‘ng tuman hokimligi mas’ul xizmatlarga aniqlangan holatlarni qayd etish, hududni tekshirish hamda o‘lgan hayvonlar va qushlarni yig‘ishni tashkil qilishni topshirgan. Hodisa sabablarini aniqlash uchun sohaviy xizmatlar va huquqni muhofaza qiluvchi organlarni jalb qilish rejalashtirilayotgani ham xabar qilingan. (Pastdagi suratda Chilonzor tumani 26-mavzeda yuz bergan holat).

“Hayvonlar nima sababdan nobud bo‘layotganini aniqlash, tegishli ekspertizalar o‘tkazish va bu holatlar bir-biriga bog‘liq yoki bog‘liq emasligini tekshirish zarur. Agar hayvonlar qasddan zaharlangani tasdiqlansa, aybdorlar aniqlanib, javobgarlikka tortilishi kerak! Eng muhimi, biz tekshiruv haqiqiy natijalarini ko‘rmoqchimiz. Holat nazoratga olingani haqidagi navbatdagi xabarni emas!” — deyiladi xabarda.
- #Chilonzor tumani
- #toshkent
- #Hayvonlar









