Umid Shodiyev BAA Prezidentiga ishonch yorliqlarini topshirdi
Tantanali marosim BAA davlat rahbarining Abu-Dabi shahridagi "Qasr Al-Vatan" rasmiy qarorgohida bo‘lib o‘tdi. Muloqot chog‘ida tomonlar O‘zbekiston va Amirliklar o‘rtasidagi do‘stona hamda ko‘p qirrali munosabatlarning bugungi holati va rivojlanish istiqbollarini atroflicha muhokama qilgan.
Shayx Muhammad bin Zoid Ol Nahayon ikkita davlat o‘rtasidagi strategik sheriklik izchil kengayib borayotganini alohida ta’kidlab, yangi elchining mas’uliyatli faoliyatida muvaffaqiyatlar tiladi. Shuningdek, BAA rahbari diplomatga o‘z vazifalarini to‘laqonli va samarali amalga oshirishi uchun barcha zarur sharoitlar yaratib berilishini bildirgan.
Uchrashuv davomida tomonlar o‘zaro savdo-iqtisodiy ko‘rsatkichlarni oshirish, investitsiyaviy loyihalarni ko‘paytirish hamda turizm yo‘nalishidagi hamkorlik aloqalarini yanada mustahkamlashga ustuvor e’tibor qaratishga kelishib olgan.
Avvalroq Ayubxon Yunusov O‘zbekistonning Suriyadagi elchisi etib tayinlangan edi.
