“U mening do‘stim bo‘lib qoladi, ammo lavozimga tayinlamayman”. Sadir Japarov Qamchibek Tashiyevning iste’fosi sababini ochiqladi
Prezident Sadir Japarov jurnalist Ali Toqtakunovga bergan intervyusida sobiq MXDQ rahbari Qamchibek Tashiyev bilan 2005-yildan buyon yaqin do‘st va oilaviy qadrdon ekanini ta’kidladi. Biroq sobiq safdoshining lavozimdan ketishiga uning yaqin atrofiga bo‘lgan nazoratni boy bergani sabab bo‘lganini ochiq aytdi.
“Ha, besh yil davomida u yaxshi ishladi. Ammo uning bir kamchiligi – do‘stlari va sinfdoshlarining faoliyatini nazorat qila olmadi. Shu sababli u lavozimidan ketdi”, deydi Qirg‘iziston prezidenti.
Davlat rahbarining qayd etishicha, Tashiyevning xatolari bo‘lishi tabiiy, lekin bu uning mamlakat oldidagi xizmatlarini yo‘qqa chiqarmaydi. Prezident sobiq amaldorning mamlakat erishgan muvaffaqiyatlariga qo‘shgan ulkan hissasini e’tirof etgan holda, unga davlat boshqaruvida qayta o‘rin berilmasligini keskin uqtirib o‘tdi.
“U mening do‘stim bo‘lib qoladi, ammo uni biror davlat lavozimiga tayinlash rejam yo‘q. U dam olishi, ehtimol, xatolarini tahlil qilib, qayerda adashganini tushunishi kerak”, deya ta’kidladi Sadir Japarov.
