Turkiya Netanyaxuni xalqaro qidiruvga berdi
Turkiyaning Istanbul 11-Og‘ir jinoyatlar sudi Isroil Bosh vaziri Binyamin Netanyaxuga nisbatan Interpol orqali qizil byulleten (xalqaro qidiruv) chiqarish haqida qaror qabul qildi. Bu haqda “Sabah gazetesi” xabar berdi. Qaror G‘azoga insonparvarlik yordami olib ketayotgan Global Sumud Flotiliyasiga uyushtirilgan hujum yuzasidan ko‘rilayotgan jinoyat ishi doirasida chiqarilgan.
Sud hay’ati Netanyaxuni mazkur ish bo‘yicha ayblanuvchi sifatida xalqaro qidiruvga berishni ma’qullagan. Netanyaxu va yana 34 nafar yuqori martabali Isroil amaldoriga nisbatan insoniyatga qarshi jinoyatlar, genotsid, mulkka zarar yetkazish, og‘ir talonchilik, qasddan tan jarohati yetkazish, qiynoqqa solish, transport vositalarining harakatiga to‘sqinlik qilish, ularni olib qochish yoki noqonuniy ushlab turish, shuningdek shaxsni erkinlikdan noqonuniy mahrum qilish moddalariga asosan davlat ayblovi qo‘zg‘atilgan.
“Anadolu” axborot agentligi Istanbul Bosh prokuraturasi Netanyaxu va yana 34 nafar gumonlanuvchiga nisbatan ayblov xulosasini tayyorlagan edi. Prokuratura har bir ayblanuvchi uchun umrbod og‘irlashtirilgan ozodlikdan mahrum etish jazosi bilan birga, 1 102 yil 9 oydan 4 596 yilgacha ozodlikdan mahrum qilish jazosini tayinlashni so‘ragan.
Ayblov xulosasida qayd etilishicha, 2025-yil sentyabr oyida Global Sumud Flotiliyasi faollari dengiz orqali G‘azoga insonparvarlik yordamini yetkazish uchun yo‘l olgan paytda Isroil harbiy-dengiz kuchlari xalqaro suvlarda kemalarga bostirib kirgan. Isroil harbiylari kemadagi ko‘ngillilarni qo‘lga olib, Isroil hududiga olib ketgan. Tashkilotchilar bu harakatni noqonuniy aralashuv deb baholagan.
Hujjatga ko‘ra, ushbu hodisadan so‘ng Istanbul Bosh prokuraturasi BMTning Dengiz huquqi to‘g‘risidagi konvensiyasi, Turkiya Jinoyat-protsessual kodeksining 15-moddasi hamda Turkiya Jinoyat kodeksining 12 va 13-moddalariga tayangan holda o‘z tashabbusi bilan tergov boshlagan.
