Tuproqqal’ada bronza davriga oid sirli qabriston topildi
Arxeologik ekspeditsiya davomida yodgorlik hududida toshdan qurilgan yashiksimon 19 ta qabr qayd etildi. Tadqiqotlar jarayonida barcha jasadlar o‘ziga xos tarzda – g‘ujanak holatda dafn qilingani oydinlashdi. Qabrlarni qazish chog‘ida bronzadan yasalgan turli buyumlar, nafis munchoqlar hamda qadimiy marosim anjomlari topib olingan.
Olimlarning dastlabki xulosalariga ko‘ra, topilgan dafn inshootlari va buyumlar Janubiy Qozog‘istonning Sirdaryo havzasidagi arxeologik yodgorliklarga juda o‘xshab ketadi. Bu holat bronza davridayoq Markaziy Osiyo hududida yashagan turli qabilalar o‘rtasida yaqin madaniy va savdo aloqalari mavjud bo‘lganidan dalolat beradi.
Hozirda topilmalarning aniq yoshini hamda qaysi madaniyatga tegishliligini belgilash bo‘yicha laboratoriya va antropologik tadqiqotlar davom ettirilmoqda. Ma’lumot uchun, yaqinda Qashqadaryoning Qamashi tumanidagi Boburtepa yodgorligida ham qadimiy inshoot qoldiqlari va saqlanib qolgan devoriy bezaklar aniqlangan edi.
