Qashqadaryoda IV-V asrlarga oid qadimiy ibodatxona va noyob devoriy gullar tasviri topildi
Madaniy meros agentligi bergan ma’lumotga ko‘ra, topilgan qadimiy inshoot xonalaridan birining g‘arbiy devorida loy suvoq ustiga chizilgan lola hamda oq gullar tasviri namoyon bo‘lgan. Tasvirlar kompozitsiyasi qizil rangdagi to‘lqinsimon chiziqlar bilan bezatilgan bo‘lib, keyinchalik devor ustidan oq ohakli suvoq tortib yopib ketilgan.
Arxeologlarning dastlabki xulosalariga ko‘ra, binoning nihoyatda qalin qurilgan devorlari va unga berilgan o‘zgacha bezaklar ushbu obyekt milodiy IV–V asrlarda diniy marosimlar va ibodatlarni o‘tkazishga mo‘ljallanganidan dalolat beradi.
Hozirgi kunda ushbu me’moriy inshootning aniq vazifasi, qurilish uslubi va davr uchun tutgan tarixiy o‘rnini to‘liq ochib berish maqsadida hududda arxeologik tadqiqotlar hamda ilmiy qazishmalar izchil davom ettirilmoqda.
Avvalroq Surxondaryodan dunyodagi eng qadimiy 4000 yillik pilla topilgan edi.
