Tramp Turkiyada Temuriylar bayrog‘i ostida kutib olindi
AQSH Prezidenti Donald Tramp Anqarada o‘tayotgan NATO sammiti doirasida Turkiya Prezidenti Rajab Tayyib Erdo‘g‘on bilan muzokaralar o‘tkazdi. Rasmiy qabul marosimida Turkiya davlatchilik tarixini ulug‘lash maqsadida an’anaviy ravishda foydalaniladigan 16 ta qadimiy turkiy imperiya, jumladan, Temuriylar va Boburiylar davlati bayroqlari o‘rin olgan.
Uchrashuvda Donald Tramp Vashington Turkiyaga qarshi CAATSA qonuni doirasida joriy etgan cheklovlarni olib tashlashini ma’lum qilgan. Mazkur sanksiyalar 2020-yilda Turkiya Rossiyadan S-400 havo hujumidan mudofaa tizimlarini sotib olgani sababli kiritilgan edi.
“Biz sanksiyalarni olib tashlaymiz. Do‘stlarimizga nisbatan sanksiyalar qo‘llashni istamaymiz”, degan AQSH Prezidenti.
Shuningdek, Tramp ancha vaqtdan beri davom etayotgan F-35 qiruvchi samolyotlari bo‘yicha nizo yuzasidan tez orada yakuniy qaror qabul qilinishini bildirdi. Erdo‘g‘on esa beshinchi avlod qiruvchilari bo‘yicha Anqara sammitida ijobiy qaror qabul qilinishiga ishonishini va Turkiyaga beshta samolyot va’da qilinganini eslatib o‘tgan. Muzokaralarda Turkiyaning milliy KAAN qiruvchi samolyoti dasturi doirasida dvigatellarga texnik xizmat ko‘rsatish bo‘yicha ham AQSH ko‘magiga oid xushxabarlar e’lon qilinishi kutilayotgani aytildi.
Muzokaralarda harbiy hamkorlik va savdo-sotiq masalalari asosiy o‘rinni egallagan. Tramp Erdo‘g‘on prezidentligi davrida Turkiya harbiy jihatdan juda kuchli davlatga aylanganini ta’kidlab, uning yetakchiligini yuqori baholagan.
Qolaversa, Oq uy rahbari Erdo‘g‘onni o‘z do‘sti deb atagan va agar sammit Turkiyada o‘tmaganida unda qatnashmagan bo‘lishini, so‘nggi yillarda NATOdan ko‘ngli qolganini yashirmagan. Turkiya Prezidenti esa ushbu tashrif Anqaraga kuch bag‘ishlaganini qayd etdi.
Ikki davlat rahbarlari uchrashuv davomida Rossiya-Ukraina urushi, Eron-AQSH munosabatlari va G‘azoda tinchlikka erishish sa’y-harakatlarini ham muhokama qilgan.
