Toshkentning Chilonzor, Yashnobod va Yangihayot tumanlariga yangi hokim tasdiqlandi
Tsohkent shahar hokimligining yozishicha, Abdulxakov Abdulaziz Axatovich Yashnobod tumaniga, Lazizbek Temirov Yangihayot tumaniga va Hayot Inog‘amov Chilonzor tumaniga hokim etib tasdiqlandi. Bu haqda poytaxt hokimligi axborot xizmati ma’lum qildi.
Abdulxakov Abdulaziz Axatovich 1980-yil Toshkent shahrida tug‘ilgan. 2006-yilda Toshkent davlat texnika universitetini tamomlagan. Mehnat faoliyati davomida hokimlik tizimida qurilish, arxitektura va kommunal xo‘jalik sohalarida qator mas’ul lavozimlarda ishlagan.
2018–2025-yillarda Mirzo Ulug‘bek tumani hokimining qurilish, infratuzilma va obodonlashtirish yo‘nalishlari bo‘yicha o‘rinbosari lavozimida faoliyat yuritgan. 2025-yildan Toshkent shahar “UET Construction” MChJ ijtimoiy obyektlarni qurish departamenti direktori lavozimida ishlagangan.
Yangihayot tumaniga tasdiqlangan Temirov Lazizbek Pulatovich 1989-yil Farg‘ona viloyati Farg‘ona tumanida tug‘ilgan. 2012-yilda Toshkent davlat iqtisodiyot universitetini, 2021-yilda esa mazkur universitet magistraturasini tamomlagan.
Mehnat faoliyati davomida iqtisodiyot va davlat boshqaruvi tizimida qator mas’ul lavozimlarda ishlagan. 2024-yildan Yashnobod tumani hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — tuman iqtisodiyot va moliya bo‘limi boshlig‘i lavozimida faoliyat yuritgan.
Chilonzor tumaniga hokim etib tasdiqlangan Hayot Inog‘amov 1986-yilda Toshkent shahrida tug‘ilgan. 2006-yilda Toshkent avtomobil yo‘llari institutini, 2008-yilda esa mazkur institut magistraturasini tamomlagan.
Mehnat faoliyati davomida transport va yo‘l infratuzilmasi hamda davlat boshqaruvi tizimida qator mas’ul lavozimlarda faoliyat yuritgan. 2020-yildan Yangihayot tumani hokimi lavozimida ishlab kelgan.
