Toshkentdagi Farg‘ona yo‘li ko‘chasida joylashgan “A” yo‘laklarida qoidabuzarlarni qayd etuvchi kameralar ishga tushirildi
Ushbu chora poytaxt transport infratuzilmasini rivojlantirish hamda yangi BRT liniyalarini tashkil etish doirasida amalga oshirilmoqda.
Shu bilan birga, Toshkentning boshqa markaziy ko‘chalarida joylashgan ajratilgan yo‘laklarda ham bosqichma-bosqich nazorat qurilmalari o‘rnatilmoqda. Asosiy maqsad – tirbandliklar sharoitida jamoat transportining uzluksiz va ustuvor harakatlanishini ta’minlashdan iborat.
Yengil avtomobillarning “A” yo‘lagiga chiqib harakatlanishi o‘nlab yo‘lovchilarning manziliga o‘z vaqtida yetib borishiga haqiqiy to‘sqinlik tug‘diradi. Bir vaqtning o‘zida 50 nafardan ortiq yo‘lovchini tashish quvvatiga ega bo‘lgan avtobuslar aynan ushbu tasdiqlangan yo‘laklar orqali qatnov jadvaliga qat’iy rioya qila oladi.
Belgilangan tartibga muvofiq, har kuni soat 06:00 dan 23:00 gacha maxsus ruxsatnomaga ega bo‘lmagan transport vositalarining ajratilgan yo‘lakda harakatlanishi taqiqlanadi. Mutasaddilar haydovchilarni yo‘l belgilariga rioya etishga hamda belgilangan soatlarda avtobus yo‘laklarini band qilmaslikka chaqirmoqda.
