Toshkentda O‘zbekiston va Hindiston o‘rtasida 12 ta strategik shartnoma imzolandi
Toshkentda o‘tkazilgan oliy darajadagi muloqotlar yakunida ikki mamlakat strategik sherikligini yangi bosqichga olib chiquvchi qator amaliy hujjatlar imzolandi. Kelishuvlar doirasida 2026-2030-yillarga mo‘ljallangan madaniy almashinuv hamda 2026–2028-yillardagi turizm hamkorlik dasturlari tasdiqlanib, Samarqand viloyati va Hindistonning Gujarat shtati o‘rtasida to‘g‘ridan-to‘g‘ri sheriklik munosabatlari yo‘lga qo‘yildi.
Ikki tomonlama sheriklik, shuningdek, yuqori texnologiya hamda ilmiy sohalarni ham qamrab oladi. Xususan, an’anaviy tibbiyot (Ayurveda), atrof-muhitni muhofaza qilish, geologiya va mineral resurslar, shuningdek, Fayoztepa hamda Qoratepa hududlarida arxeologik tadqiqotlar o‘tkazish bo‘yicha kelishuvlarga erishildi.
Ta’lim yo‘nalishida Jahon iqtisodiyoti va diplomatiya universiteti va Sushma Svaraj nomidagi Tashqi aloqalar instituti hamkorlik qiladigan bo‘ldi.
Oliy darajadagi uchrashuv so‘ngida Shavkat Mirziyoyev va Narendra Modi tashrif yakunlari bo‘yicha qo‘shma bayonotni qabul qildilar. Imzolangan barcha hujjatlar va kelishuvlar ikki davlat o‘rtasidagi savdo-iqtisodiy, investitsiyaviy va gumanitar aloqalarni jadal rivojlantirishga xizmat qiladi.
