Toshkentda dizayn-kod talablari qayta ko‘rib chiqiladi
Shahar hokimligi ma’lumotiga ko‘ra, asosiy e’tibor tadbirkorlar bilan ochiq muloqot qilish, dizayn-kod talablari va ularni bajarish tartibini tushunarli tarzda yetkazish hamda yuzaga kelayotgan masalalarni individual ko‘rib chiqishga qaratiladi.
11-maydan 26-iyulgacha dizayn-kodni joriy etish ishlari poytaxtdagi 56 ta ko‘chada joylashgan 3 228 ta tadbirkorlik subyektini qamrab olgan. O‘tkazilgan so‘rovnoma davomida ayrim tadbirkorlarga talablar, hujjatlarni rasmiylashtirish tartibi va ishlar ketma-ketligi yetarlicha tushuntirilmagani aniqlangan.
Hozirga qadar 509 nafar tadbirkor o‘z binosi fasadini yangilagan, 2 627 nafari esa ishlarni yakunlash jarayonida.
Hokimlikning ta’kidlashicha, kelgusida dizayn-kodni joriy etishda tadbirkorlar manfaatlari ustuvor hisobga olinadi. Jarayon biznes uchun asossiz qiyinchiliklar tug‘dirmagan holda poytaxt qiyofasini yaxshilashga qaratiladi.
