Toshkentda 3 yoshli o’g’liga doimiy zoʻravonlik qilib kelgan onaga jinoiy ish qoʻzgʻatildi
Toshkent shahri Yashnabod tumanida 3 yoshli o’g’liga uxlatuvchi dori berib, doimiy zoʻravonlik qilib kelgan onaga jinoiy ish qoʻzgʻatildi. Bu haqda Bolalar ombudsmani xabar berdi.
Fuqarolardan kelib tushgan murojaatga ko‘ra, 1989- yilda tug‘ilgan ayol 3 yoshli oʻgʻliga nisbatan muntazam ravishda jismoniy zoʻravonlik qilgan. Shuningdek, uni doimiy qarovsiz va parvarishsiz qoldirgan.
Ushbu holat IIB va Ijtimoiy himoya milliy agentligi tomonidan oʻrganildi. Shuningdek, bolaga tazyiq va qiynash xatti-harakatlari yuzasidan Jinoyat kodeksiningning 110-moddasi (Qiynash) bilan jinoyat ishi qoʻzgʻatildi hamda bolaga himoya orderi rasmiylashtirildi.
Hozirda voyaga yetmagan bolaning salomatligini tiklash yuzasidan barcha zaruriy tibbiy muolajalar oʻtkazilmoqda. Tuman vasiylik organi bolaga vaqtincha vasiylik belgiladi. Onasi esa ota-onalik majburiyatlarini bajarmagani sababli uni onalik huquqidan mahrum qilish boʻyicha sudga hujjatlar tayyorlanmoqda.
