“Tolibon” vaziri O‘zbekistonda Islomning faqat nomi qolganini iddao qildi. O‘zbekiston bu xabarlarni rad etmoqda
“Tolibon”ning Ezgulikni targ‘ib qilish va illatlarning oldini olish vaziri Xolid Hanafi Paktia viloyatiga safari chog‘ida Buxoriy va Termiziy kabi taniqli muhaddislar yurti bo‘lgan O‘zbekistonning Samarqand, Buxoro va Termiz shaharlarida bugungi kunda Islom faqat tildagina qolib ketganini iddao qildi. Bu haqda “Afghanistan International” va BBC xabar bermoqda.
Uning fikriga ko‘ra, bunday holatga O‘zbekiston ulamolarining diniy ahkomlar ijrosini hukumatga topshirib qo‘ygani sabab bo‘lgan. Ushbu bayonotlar O‘zbekiston aholisining aksariyati musulmon bo‘lgan bir vaqtda yangramoqda.
Portal24.uz mazkur vaziyatga aniqlik kiritish maqsadida O‘zbekiston Tashqi ishlar vazirligining (TIV) matbuot kotibi Omonulla Fayziyev bilan bog‘landi. Vazirlik voizi jurnalist Abdurahmon Ergashev bilan muloqotda “Tolibon” vazirining O‘zbekistondagi diniy muhitga doir shov-shuvli bayonotlarini “dezinfomatsiya” deb atadi va bu masala bo‘yicha elchi darajasida muloqot o‘tkazilganini ma’lum qildi.
Muloqot davomida jurnalist ushbu xabarlar xalqaro nashrlarda, xususan, nufuzli “Afghanistan International” portalida e’lon qilingani va Afg‘onistondagi millionlab o‘zbeklar orasida keng muhokama qilinayotganini bildirdi. Shuningdek, yolg‘on axborotning oldini olish maqsadida vaziyatga aniqlik kirituvchi raddiya yoki rasmiy munosabat berishni taklif qildi.
Bunga javoban TIV matbuot kotibi Omonulla Fayziyev ushbu xabarlarni mutlaqo asossiz va “dezinfomatsiya” deb baholadi. Tarqalgan bayonot rasman e’lon qilinmagan va Afg‘oniston rasmiy ommaviy axborot vositalari tomonidan tarqatilmaganini bildirdi. Matbuot kotibining so‘zlariga ko‘ra, mazkur masala yuzasidan O‘zbekiston elchisi afg‘on tomoni bilan gaplashgan va vaziyatga aniqlik kiritilgan.
