“Tolibon” vaziri Hirotda ayollar va namoyishchilar hibsga olinishini oqlab bayonot berdi

Afg‘onistonda 2026-yilning 8-iyun kuni hijob qoidalarini buzganlikda ayblanib 10 dan ortiq ayolning hibsga olinishi va qamoqqa tashlanishiga qarshi namoyish uyushtirilgan edi. Guvohlarning aytishicha, politsiya namoyishchilarni tarqatish uchun o‘q uzgan, oqibatda kamida uch kishi yaralangan.

Guvohlarga ko‘ra, Hirotda bo‘lib o‘tgan namoyishda 100–150 ga yaqin kishi qatnashgan. “Tolibon” namoyishni bostirish uchun aholiga qarata o‘q uzgan. Guvohlardan biri Kakarning aytishicha, u namoyish bo‘layotgan hududdan mashinada o‘tib ketayotganida politsiya avtomobillari kelganini va xodimlar avval havoga qarata o‘q uzganini ko‘rgan.

Mazkur voqeadan so‘ng, 13-iyul kuni “Tolibon” muvaqqat hukumatining Ezgulikni targ‘ib qilish va illatlarning oldini olish vaziri Xolid Xanafi Hirotda namoyishchilar va ayollarning hibsga olinishini oqlab bayonot berdi. Unga ko‘ra, bir qator shaxslar “hijobsizlikni targ‘ib qilish, keskinlikni keltirib chiqarish va salbiy mazmundagi materiallarni tarqatish” ayblovlari bilan qo‘lga olingan. Xanafi ularga nisbatan ko‘rilayotgan choralar “shariat qonunlarini amalga oshirish” doirasida olib borilayotganini ta’kidladi.

2021-yilda AQSH boshchiligidagi xalqaro kuchlar mamlakatni tark etganidan so‘ng hokimiyatni egallagan “Tolibon” davrida Afg‘onistonda norozilik namoyishlari kam uchraydi. Mamlakatda shariat qonunlarining qat’iy talqiniga asoslangan qoidalar joriy etilgan. Hukumat muxolifat va norozilikka toqat qilmaydi, hukumat qarorlariga qarshi namoyishlar esa noqonuniy hisoblanadi.

Amaldagi tartiblarga ko‘ra, ayollar va qizlarga nisbatan keskin cheklovlar o‘rnatilgan. Jumladan, qizlarning boshlang‘ich ta’limdan keyin o‘qishi taqiqlangan, shuningdek, ayollarning kiyinishiga ham qat’iy talablar qo‘yilgan.