Tolibon Afg‘onistonda BBC radiosi ko‘rsatuvlarini butunlay taqiqlab qo‘ydi
Tolibon ma’muriyatining Axborot va madaniyat vazirligi ushbu qarorni doimiy “qoidabuzarliklar” bilan izohlagan bo‘lsada, aynan qanday talablar buzilganiga aniqlik kiritgani yo‘q.
Ushbu cheklov har hafta millionlab afg‘onistonliklar, jumladan o‘rta maktablarda o‘qishi taqiqlangan qizlar foydalanadigan axborot va ta’lim dasturlariga bevosita ta’sir ko‘rsatadi. Hozirda media-korporatsiya vaziyatni izga solish bo‘yicha mahalliy rasmiylar bilan muzokaralar olib bormoqda, efirlar esa vaqtincha qisqa va o‘rta to‘lqinlar hamda internet orqali uzatilmoqda.
2021-yilda Tolibon hokimiyatga kelgach, OAV ustidan nazorat keskin kuchaytirilgan edi. Amerikaning qator xalqaro OAVlari faoliyati taqiqlangach, “BBC” mamlakatda mustaqil faoliyat yuritayotgan yagona xalqaro axborot tarmog‘i bo‘lib qolayotgan edi.
Afg‘onistonda elektr energiyasi tanqisligi hamda internet narxining qimmatligi sababli FM radiosi aholi uchun eng ommabop axborot manbai hisoblanardi. Ma’lumot uchun, “BBC”ning Afg‘onistondagi maxsus xizmati 1981-yildan buyon uzluksiz faoliyat ko‘rsatib kelayotgan edi.
