Timur Ismoilov Ichki ishlar vazirining birinchi o‘rinbosari - Jamoat xavfsizligi departamenti boshlig‘i etib tayinlandi
Timur Kamalatdinovich Ismoilov 1983-yilda Qoraqalpog‘iston Respublikasi To‘rtko‘l tumanida tug‘ilgan. Ichki ishlar organlarida ko‘p yillik xizmat stajiga ega bo‘lgan u 2019-yil may oyidan Jinoyat qidiruv bosh boshqarmasi boshlig‘i lavozimida ishlagan. Keyinchalik Terrorizm va ekstremizmga qarshi kurashish bosh boshqarmasiga rahbarlik qilgan. 2020-yil yanvarida prezident farmoni bilan II darajali “Shon-sharaf” ordeni bilan mukofotlangan.
2024-yil 31-yanvardan boshlab Surxondaryo viloyati Ichki ishlar boshqarmasini boshqargan. Ushbu lavozimda ikki yarim yildan ortiq ishlaganidan so‘ng, endi respublika miqyosidagi muhim lavozimga ko‘tarildi.
Yangi rahbarga jamoat xavfsizligini ta’minlash, huquqbuzarliklar profilaktikasi va jinoyatchilikning barvaqt oldini olish tizimini yanada takomillashtirish vazifasi yuklatildi.
Shuningdek, tizimni raqamlashtirish ishlarini qat’iy nazorat qilish, ichki ishlar organlarining boshqa davlat idoralari va jamoat tashkilotlari bilan hamkorligini kuchaytirish, jamoat tartibini saqlashning zamonaviy usullarini keng joriy etish, aholining huquqiy madaniyatini oshirish va huquqni muhofaza qiluvchi organlarga ishonchini mustahkamlash bo‘yicha aniq chora-tadbirlarni amalga oshirish talab etilmoqda.
