Terma jamoadagi "kalamush", 4 mln yevrolik maosh xabarlari va Osiyo kubogidagi maqsadlar — Fabio Kannavaro matbuot anjumanida nimalar dedi?
Kannavaro 5-avgust kuni bo‘lib o‘tgan matbuot anjumanida so‘nggi paytlarda O‘zbekiston terma jamoasi haqida ko‘plab asossiz xabarlar tarqalganini aytdi.
"Men xorijlik murabbiy bo‘lganim uchun juda ko‘p yolg‘on ma'lumotlar chiqdi. Balki terma jamoa ichida 'kalamush' bo‘lgani uchun shunday bo‘lgandir."
Murabbiyning ushbu gapi matbuot anjumanidagi eng ko‘p muhokama qilingan fikrlardan biriga aylandi.
Kannavaro Osiyo kubogi oldidan jamoa oldiga katta maqsad qo‘yilganini ta'kidladi.
Uning aytishicha, Jahon chempionatiga kelganda u avvaldan katta natija kutmaslik kerakligini aytgan. Biroq Osiyo kubogida O‘zbekiston terma jamoasi hech bir raqibdan cho‘chimay, yuqori natija uchun kurashadi.
Bosh murabbiy Toshkentda Eron milliy terma jamoasiga qarshi o‘rtoqlik uchrashuvini tashkil etish bo‘yicha muzokaralar davom etayotganini ma'lum qildi.
Uning fikricha, kuchli raqiblarga qarshi nazorat uchrashuvlari Osiyo kubogiga tayyorgarlikda muhim ahamiyat kasb etadi.
Kannavaro ayrim qarorlari yuzasidan ham ochiq fikr bildirdi.
“Har doim ham haq bo‘lish mumkin emas.”
U Behruz Karimovni birinchi o‘yinda maydonga tushirishni to‘g‘ri qaror deb hisoblashini, biroq keyingi uchrashuvda darvozabonni almashtirgani ehtimol xato bo‘lganini tan oldi.
Murabbiyning so‘zlariga ko‘ra, Jahon chempionatida barcha darvozabonlarga o‘yin amaliyoti berish rejalashtirilgan edi, ammo musobaqa davomida buni to‘liq amalga oshirishning imkoni bo‘lmagan.
Kannavaro endilikda futbolchilar terma jamoaga avvalgi xizmatlari uchun emas, ayni paytdagi sport formasiga qarab chaqirilishini aytdi.
"Kim o‘zini yaxshi ko‘rsatsa, o‘shani chaqiraman."
Matbuot anjumanida Kannavaro ayrim jurnalistlarning faoliyatiga ham to‘xtaldi.
"Ba'zi jurnalistlar kelib menga savol berishga o‘zlarida kuch topa olmadi. Kamera oldida o‘tirib gapirish oson."
Murabbiy hech bir jurnalistning ismini tilga olmadi. Shunga qaramay, ijtimoiy tarmoqlarda ushbu fikrlar jurnalist Xushnud Xudoyberdiyevga qaratilgani haqida taxminlar bildirildi.
Xushnud Xudoyberdiyev esa o‘zining ijtimoiy tarmoqdagi sahifasida matbuot anjumani bo‘lib o‘tayotganidan xabari bo‘lmaganini yozdi.
“O‘lay agar, bugun matbuot anjumani borligini bilmasdim. Yanada rostini aytsam, bilganimda ham bormasdim, boshqa muhimroq ishlarim bor edi. Kannavarodan uzr so‘rayman.”
Kannavaro O‘zbekistonning istiqbolli futbolchilari imkon qadar Yevropa klublariga yo‘l olishi tarafdori ekanini bildirdi.
Uning fikricha, yosh futbolchilar BAA yoki Saudiya Arabistoniga emas, aynan Yevropa chempionatlarida o‘ynashni maqsad qilishi lozim.
Murabbiy yiliga 4 million yevro maosh olayotgani haqidagi xabarlarni rad etdi. Kannavaroning aytishicha, O‘FA bilan tuzilgan kelishuvga ko‘ra, o‘zi bilan olib kelgan murabbiylar shtabining ayrim xarajatlarini shaxsan o‘zi qoplaydi.
Misol tariqasida u hujumchilar bilan ishlovchi murabbiy Rolando Byanki terma jamoada tekinga ishlayotganini, fizioterapevt Simyone Sidjilyo esa avvalgi ish joyidagi maoshining atigi 20 foiziga faoliyat yuritayotganini ma'lum qildi.
Fabio Kannavaroning matbuot anjumanidagi bayonotlari terma jamoa ichidagi muhit, seleksiya tamoyillari va Osiyo kubogi oldidan belgilangan maqsadlar borasida qator muhokamalarga sabab bo‘ldi. Murabbiy yaqinlashib kelayotgan musobaqada jamoa yuqori natija uchun kurashishini ta'kidladi.
