Sirdaryoda pora talab qilgan sobiq IIB xodimlari 5 va 6 yilga qamaldi
Sirdaryo viloyatida jinoyat ishini ma’muriy huquqbuzarlikka aylantirib berish evaziga 35 mln so‘m talab qilgan Xovos tumani ichki ishlar organlarining 2 nafar sobiq tezkor xodimiga sud hukmi o‘qildi. Ulardan biri 5 yil 1 oyga, ikkinchisi esa 6 yil 1 oyga ozodlikdan mahrum qilindi. Bu haqda “Bu kun” ko‘rsatuvida ma’lum qilindi.
Ma’lum qilinishicha, Xovos tumanidagi fermer xo‘jaligi rahbari yer maydonida sodir etilgan noqonuniy holat yuzasidan huquqni muhofaza qiluvchi organlarga murojaat qilgan. Tekshiruv davomida fermerga 30–40 mln so‘m atrofida zarar yetkazilgani aniqlangan.
Xovos tumani IIB tezkor-qidiruv bo‘limining 2 nafar xodimi jinoyatni yashirish maqsadida soxta dalillar tashkil qilgan. Ular fermerga yetkazilgan zararni to‘liq qoplatish imkoni yo‘qligini aytib, 10–12 mln so‘m undirib berishni taklif qilgan. Fermer xo‘jaligi rahbari bunga rozi bo‘lgan.
Shundan so‘ng xodimlar jinoyatni sodir etgan shaxsga zarar miqdori 50 mln so‘m ekanini, pulni to‘lamasa qamalib ketishini aytgan. U dastlab ularga 24 mln so‘m bergan. Ushbu mablag‘ning 12 mln so‘mi fermerga yetkazilgan.
Sobiq xodimlar ishni jinoiy emas, ma’muriy tartibda ko‘rib chiqishga yordam berish evaziga jami 35 mln so‘m talab qilgan. Qolgan 11 mln so‘mni olayotgan vaqtda ular tezkor tadbir davomida qo‘lga olingan.
Jinoyat ishlari bo‘yicha Sayxunobod tuman sudi sudlanuvchilardan birining jinoyatni fosh etishda faol yordam berganini inobatga olib, unga 5 yil 1 oy, ikkinchisiga esa 6 yil 1 oy ozodlikdan mahrum qilish jazosini tayinladi.
Shuningdek, shu kabi jinoyatlarning oldini olish choralarini ko‘rish yuzasidan Sirdaryo viloyati Ichki ishlar boshqarmasiga xususiy ajrim chiqarildi.
