Shavkat Mirziyoyev Xitoydagi yong‘in va suv toshqinlari munosabati bilan Si Szinpinga hamdardlik bildirdi
Prezident Shavkat Mirziyoyev Guansi-Chjuan avtonom rayonidagi suv toshqinlari hamda Futszyan provinsiyasida yuz bergan kuchli yong‘in oqibatida ko‘plab insonlar halok bo‘lgani, jiddiy jarohat olgani va katta talafot ko‘rilgani munosabati bilan Xitoy Xalq Respublikasi Raisi Si Szinpinga hamdardlik yo‘lladi. Bu haqda Prezident matbuot kotibi Sherzod Asadov ma’lum qildi.
Davlat rahbari vafot etganlarning oila a’zolari va yaqinlariga sabr-toqat, jarohat olganlar tez fursatda sog‘ayib ketishini tilagan.
Xitoy davlat axborot agentligiga ko’ra, 9-iyul kuni mamlakat janubi-sharqidagi Jinjiang shahrida joylashgan poyabzal fabrikasida yuz bergan yong‘in oqibatida kamida 28 kishi halok bo‘lgan. Prezident Si Szinpin ushbu yong‘in katta talafotlarga olib kelganini ta’kidlab, aybdorlar qat’iy javobgarlikka tortilishi kerakligini aytgan.
Futszyan provinsiyasidagi Jinjiang shahri dunyodagi sport poyabzallarining 20 foizini ishlab chiqarishi aytilishi sababli ko‘pincha Xitoyning “poyabzal poytaxti” deb ataladi. Qancha odam jarohatlangani hozircha noma’lum. Yong‘inni o‘chirish va odamlarni qutqarish uchun rasmiylar 500 dan ortiq xodimni safarbar qilgan.
Yong‘in sodir bo‘lgan vaqtda fabrikada 240 ga yaqin odam bo‘lgan. Evakuatsiya qilingan 213 kishidan ikki nafari keyinchalik kasalxonada vafot etdi. Dastlab bedarak yo‘qolgan deb hisoblangan yana 26 kishining jasadi topildi. Rasmiylar fabrika egalarining bir nechta xodimini hibsga oldi va kompaniyaning bank hisob raqamlari muzlatib qo‘yilgan.
Shuningdek, Xitoyning Guangsi mintaqasidagi Xenchjou shahrida “Maysak” tayfuni keltirib chiqargan kuchli suv toshqinlari oqibatida 39 kishi halok bo‘ldi. Tabiiy ofat hududdagi ko‘plab ilon fermalarining suv ostida qolishiga sabab bo‘ldi, natijada 900 ga yaqin, aksariyati zaharli bo‘lgan ilonlar aholi yashaydigan hududlarga tarqalib ketdi.
Mahalliy hayvonot bog‘ini suv bosishi oqibatida sherlar, zebralar va boshqa yovvoyi hayvonlar qochib ketgan, 16 mingdan ortiq cho‘chqa esa suvda oqib ketgan.
Hozirda rasmiylar aholini ogohlikka chaqirib, ilon tutuvchilar guruhini safarbar etdi va shifoxonalarni zaharli ilon chaqishiga qarshi zardob bilan ta’minladi. Xenchjou ilon yetishtirish sanoatining markazi bo‘lgani uchun bu hududda sudralib yuruvchilar ko‘p va ularni ushlash ishlari davom etmoqda. Hukumat aholiga kechki payt tashqariga chiqmaslikni hamda ilonlar yashiringan bo‘lishi mumkin bo‘lgan nam va o‘tloqli joylardan uzoqroq yurishni tavsiya qilmoqda.
