Shavkat Mirziyoyev Vladimir Zelenskiyga tabrik yo‘lladi
O‘zbekiston rahbarining qutlovi haqida Ukraina Prezidenti Vladimir Zelenskiy o‘zining “X” (sobiq Twitter) ijtimoiy tarmog‘idagi sahifasida ma’lum qildi. Shavkat Mirziyoyev o‘z maktubida ikki mamlakat o‘rtasidagi an’anaviy do‘stlik va o‘zaro hurmatga asoslangan munosabatlar birgalikdagi sa’y-harakatlar orqali bundan buyon ham izchil rivojlanib borishiga ishonch bildirgan. O‘zbekiston yetakchisi Zelenskiyga davlatchilik faoliyatida zafarlar, ukrain xalqiga esa tinchlik-farovonlik tilagan.
“Birgalikdagi sa’y-harakatlarimiz tufayli mamlakatlarimiz o‘rtasidagi an’anaviy do‘stlik rishtalari va o‘zaro hurmat tamoyillariga asoslangan munosabatlar bundan keyin ham izchil rivojlanishiga ishonchim komil”, degan Shavkat Mirziyoyev.
O‘z navbatida, Ukraina Prezidenti Vladimir Zelenskiy yo‘llangan samimiy tabrik uchun O‘zbekiston rahbariyatiga chuqur minnatdorlik bildirgan. U Kiyev O‘zbekiston bilan do‘stona aloqalarni yuksak qadrlashini hamda o‘zaro savdo-iqtisodiy va ikki tomonlama hamkorlikni yanada kengaytirish tarafdori ekanini ta’kidlagan. Zelenskiy O‘zbekiston xalqiga tinch va istiqbolli kelajak tilaklarini izhor etgan.
“Ukraina O‘zbekiston bilan an’anaviy do‘stlikni chuqur qadrlaydi va ikki tomonlama hamkorlik, savdo hamda iqtisodiy aloqalarni kengaytirishga sodiq qoladi”, degan Vladimir Zelenskiy.
Ta’kidlash joizki, rasmiy qutlovdan avvalroq O‘zbekiston Respublikasi Tashqi ishlar vazirligi ham o‘zining “X” sahifasida Ukraina xalqini Mustaqillik bayrami bilan tabriklab rasmiy bayonot qoldirgan edi.
