Shavkat Mirziyoyev Trampga ayvon sovg‘a qildi
O‘zbekiston Prezidenti Shavkat Mirziyoyev AQSh Prezidenti Donald Trampga an’anaviy o‘zbek ayvonlarini sovg‘a qildi. Ular Vashingtondagi G‘arbiy Potomak bog‘i hududida namoyish etiladi. Bu haqda The New York Times xabar berdi.
Nashrga ko‘ra, so‘nggi kunlarda park hududida Toshkentdan yuborilgan yuk yorliqlari tushirilgan katta qutilarni tashiyotgan yuk mashinalari ko‘rilgan. AQSh Ichki ishlar vazirligi vakili Keti Martinning aytishicha, Trump ayvonlarni AQSh xalqi nomidan qabul qilgan.
Ayvonlar o‘rnatiladigan bog‘ hududida Tramp “Amerika qahramonlari milliy bog‘i”ni barpo etishni rejalashtirmoqda. Loyiha doirasida hovuzlar, ovqatlanish maskanlari, amfiteatr va mashhur amerikaliklarning 250 ta haykalini o‘rnatish ko‘zda tutilgan.
An’anaviy Markaziy Osiyo yog‘och o‘ymakorligi bilan bezatilgan ayvonlardan parkka tashrif buyuruvchilar kuz oylarining oxiridan boshlab foydalanishi mumkin.
Biroq AQSh ma’muriyati ma’lumotlariga ko‘ra, loyiha hozircha dastlabki rejalashtirish bosqichida. AQSh Adliya vazirligi esa bog‘ loyihasi hozircha yakuniy tasdiqlangan loyiha emas, balki Tramp tomonidan ilgari surilgan dastlabki reja ekanini ma’lum qilgan.
