Shavkat Mirziyoyev To‘qayevni Qurultoyga saylov muvaffaqiyatli oʻtgani bilan tabrikladi
Oʻzbekiston Prezidenti Shavkat Mirziyoyev Qosim-Jomart To‘qayev bilan telefon orqali muloqotida Qozogʻistonda Qurultoyga saylov muvaffaqiyatli oʻtgani bilan tabrikladi. Bu haqda O‘zbekiston prezidenti matbuot xizmati xabar berdi.
Suhbat avvalida Shavkat Mirziyoyev Qozogʻiston prezidentini mamlakat tarixida ilk marotaba bir palatali Qurultoyga saylov muvaffaqiyatli oʻtkazilgani bilan samimiy tabrikladi.
“Yangi Qurultoy Qozogʻistonda izchil islohotlarni yanada ilgari surishda muhim omil boʻlishi, keng koʻlamli oʻzgarishlarni qonunchilik jihatidan samarali taʼminlashi va mamlakatning barqaror rivojlanishiga yangi surʼat bagʻishlashiga ishonch bildirildi”, – deyiladi xabarda.
Suhbat davomida davlat rahbarlari Oʻzbekiston–Qozogʻiston strategik sheriklik va ittifoqchilik munosabatlari jadal rivojlanib borayotganini mamnuniyat bilan qayd etdi.
Oʻzaro savdo hajmini yanada oshirish, sanoat kooperatsiyasini rivojlantirish, qoʻshma investitsiya loyihalarini amalga oshirish, transport-logistika aloqalarini rivojlantirish hamda ikki mamlakat hududlari oʻrtasida ishbilarmonlik aloqalarini faollashtirish uchun yangi imkoniyatlar yaratish masalalariga alohida eʼtibor qaratildi.
Yetakchilar mintaqaviy va xalqaro ahamiyatga molik dolzarb mavzular yuzasidan ham fikr almashdi.
