Shavkat Mirziyoyev ShHTning 25 yillik yubiley sammitida qatnashadi
Qirg‘iziston poytaxtida ShHT Davlat rahbarlari kengashining navbatdagi majlisi hamda kengaytirilgan “ShHT plyus” formatidagi muzokaralar bo‘lib o‘tishi rejalashtirilgan. Qirg‘iziston Prezidenti matbuot kotibi Askat Alagozov ta’kidlashicha, nufuzli anjumanda O‘zbekiston Prezidenti Shavkat Mirziyoyev ham ishtirok etadi.
Ushbu sammit tashkilot tuzilganining 25 yilligi munosabati bilan alohida tarixiy va ramziy ahamiyatga ega. Mazkur yubiley tadbiri doirasida a’zo va hamkor mamlakatlar o‘rtasidagi ko‘p tomonlama aloqalarni yanada mustahkamlash masalalari atroflicha muhokama qilinadi.
Ma’lumot uchun, Qirg‘iziston o‘z tarixida to‘rtinchi marotaba ushbu tuzilmaga raislik qilmoqda. Bishkek shahri bundan avval 2007, 2013 hamda 2019-yillarda ShHT sammitlariga va 1999-yilda “Shanxay beshligi” uchrashuviga mezbonlik qilgan edi.
