Shavkat Mirziyoyev rafiqasi bilan Qirg‘izistonga amaliy tashrif bilan bordi
O‘zbekiston Prezidenti Shavkat Mirziyoyev rafiqasi bilan Qirg‘iziston prezidenti Sadir Japarovning taklifiga binoan amaliy tashrif bilan Qirg‘izistonga bordi.
“Manas” xalqaro aeroportida O‘zbekiston rahbarini Qirg‘iziston Vazirlar Mahkamasi raisi – Prezident Administratsiyasi rahbari Adilbek Qosimaliyev va boshqa rasmiylar kutib oldi.
Tashrif doirasida Shavkat Mirziyoyev Shanxay hamkorlik tashkilotiga a’zo davlatlar rahbarlari kengashining navbatdagi yig‘ilishi hamda “ShHT plyus” formatidagi uchrashuvda ishtirok etadi.
Sammit kun tartibidan ShHT doirasidagi ko‘p qirrali hamkorlikni yanada rivojlantirish va tashkilot faoliyatini takomillashtirish, shuningdek, xalqaro va mintaqaviy hamkorlik masalalari o‘rin olgan.
Yig‘ilish yakunida ShHTning 25 yilligiga bag‘ishlangan Bishkek deklaratsiyasi hamda xavfsizlik, iqtisodiyot, transport, ekologiya, sun’iy intellekt, madaniy-gumanitar almashinuv va boshqa yo‘nalishlarda sheriklikni kengaytirishga qaratilgan hujjatlar to‘plami qabul qilinishi rejalashtirilgan.
Bugun O‘zbekiston Prezidenti xorijiy delegatsiyalar rahbarlari bilan qator ikki tomonlama uchrashuvlar o‘tkazadi. Shuningdek, davlat rahbari VI Butunjahon ko‘chmanchilar o‘yinlarining ochilish marosimida ishtirok etadi.
