Seulning eng baland binosi – Lotte Tower O‘zbekiston bayrog‘i ranglariga burkandi
13-sentyabr kuni kechqurun Janubiy Koreya poytaxtining asosiy me’moriy ramzlaridan biri hisoblangan 555 metrlik ulkan inshoot fasadida ikki davlatning davlat ramzlari va bayroq ranglari aks ettirildi. Ushbu muazzam chiroqlar namoyishi Seulda o‘tayotgan oliy darajadagi uchrashuvlar hamda ikki mamlakat o‘rtasidagi do‘stlik munosabatlarining ramziy ifodasiga aylandi.
123 qavatdan iborat Lotte World Tower Janubiy Koreyadagi eng baland va dunyodagi yetakchi osmono‘par binolardan biri sanaladi. Seulning zamonaviy infratuzilmasi va texnologik taraqqiyotini ifodalovchi ushbu inshoot o‘zining unikal arxitekturasi hamda balandlikda joylashgan ko‘rish maydonchasi bilan mashhur.
Davlat tashrifi kunlarida poytaxt Seulning boshqa nufuzli maskanlarida ham O‘zbekiston davlat ramzlari aks ettirilmoqda. Lotte World Tower binosidagi ushbu yorqin tasvir O‘zbekiston va Janubiy Koreya o‘rtasidagi har tomonlama strategik sheriklik hamda do‘stona aloqalarning yuksak saviyasini namoyish etdi.
