Sardor Umurzoqov Prezident huzuridagi Strategik rivojlanish va islohotlar agentligiga direktor etib tayinlandi
O‘zbekiston Prezidenti farmoni bilan Sardor Uktamovich Umurzoqov Prezident huzuridagi Strategik rivojlanish va islohotlar agentligi direktori lavozimiga tayinlandi. Shu munosabat bilan u O‘zbekiston Respublikasi Prezidentining strategik rivojlanish bo‘yicha maslahatchisi lavozimidan ozod etildi.
Shuningdek, Prezidentning strategik rivojlanish bo‘yicha maslahatchisi lavozimi tugatildi.
Yana bir farmonga muvofiq, Abdulla Mamasaatovich Abduqodirov boshqa ishga o‘tishi munosabati bilan Prezident huzuridagi Strategik rivojlanish va islohotlar agentligi direktori vazifasini bajaruvchi lavozimidan ozod etildi.
Sardor Umurzoqov 1977-yil 23-noyabr kuni Toshkent shahrida tug‘ilgan. U Toshkent davlat iqtisodiyot universitetida bakalavr, Buyuk Britaniyadagi Reding universitetida magistratura bosqichini tamomlagan. Iqtisodiyot yo‘nalishi bo‘yicha falsafa doktori (PhD) ilmiy darajasiga ega.
Mehnat faoliyatini 2000-yilda Tashqi iqtisodiy faoliyat Milliy banki tizimida boshlagan. 2003–2007-yillarda Yevropa tiklanish va taraqqiyot bankida ishlagan. Keyinchalik Moliya vazirligi G‘aznachiligida boshliq o‘rinbosari, birinchi o‘rinbosari hamda Toshkent shahar G‘aznachiligi boshlig‘i lavozimlarida faoliyat yuritgan.
2014–2017-yillarda “O‘zbekcharmpoyabzali” uyushmasi raisining maslahatchisi, 2017–2018-yillarda rais o‘rinbosari bo‘lgan. Uyushma “O‘zcharmsanoat” uyushmasiga aylantirilgach, 2018–2019-yillarda unga raislik qilgan.
2019-yil 28-yanvarda investitsiyalar va tashqi savdo vaziri etib tayinlangan. 2020-yil 10-martdan Bosh vazir o‘rinbosari sifatida ham faoliyat yuritgan.
2022–2023-yillarda Prezident Administratsiyasi rahbari lavozimida ishlagan. Keyinchalik Prezidentning maxsus topshiriqlar bo‘yicha, so‘ngra strategik rivojlanish bo‘yicha maslahatchisi lavozimlarida faoliyat olib borgan.
