Samarqand shahri hududi 17,2 ming gektarga kengaytirilib, Samarqand tumani tugatiladi
Senatning yalpi majlisida Samarqand viloyatining Samarqand tumanini tugatish, Oqdaryo, Pastdarg‘om, Toyloq tumanlari va Samarqand shahri chegaralarini o‘zgartirish masalasi muhokama qilindi.
Qayd etildiki, Samarqand shahri hududiga 17 226,5 gektar yer maydonini qo‘shish nazarda tutilmoqda. Bu orqali shaharning hududiy imkoniyatlarini kengaytirish, investitsion va turistik jozibadorligini oshirish, iqtisodiyot tarmoqlarini diversifikatsiya qilish hamda yuqori texnologiyali sanoat va zamonaviy xizmat ko‘rsatish sohalarini rivojlantirish ko‘zda tutilgan.
Samarqand shahri viloyatda aholi eng zich joylashgan hudud hisoblanadi. Aholi zichligini kamaytirish, transport qatnovini yaxshilash, tirbandliklarning oldini olish va zamonaviy shahar infratuzilmasini shakllantirish maqsadida chegaralarning kengaytirilmoqda.
Shuningdek, ma’muriy-hududiy boshqaruvni optimallashtirish maqsadida Samarqand tumanini tugatish va uning 28 295 gektar yer maydonini Toyloq tumaniga o‘tkazish rejalashtirilmoqda.
Senatorlar muhokama davomida Samarqand shahri aholisi 880 ming nafarga yetgani va shahar “aholisi bir million bo‘lgan shahar” maqomiga yaqinlashayotganini ta’kidladi. Shahar tarkibiga qo‘shiladigan yangi hududlarda kichik sanoat zonalari, texnoparklar va yuqori texnologiyali korxonalar tashkil etilishi, xizmat ko‘rsatish, turizm va qurilish sohalarida minglab yangi ish o‘rinlari yaratilishi kutilmoqda.
Bunda qishloq xo‘jaligi yerlarini saqlab qolish va ekologik muvozanatni ta’minlashga ham alohida e’tibor qaratilgan. Xususan, o‘tkazilayotgan 6 263 gektar yer maydonining toifalari o‘zgartirilmasdan saqlanadi.
Mazkur masala tegishli mahalla fuqarolar yig‘inlari, xalq deputatlari shahar va tuman Kengashlari hamda viloyat Kengashida muhokama qilinib, ma’qullangan.
