“Rossiyaliklarda g‘oliblik geni bor”. Putin nizoli oroldan turib “genetik g‘alaba” ritorikasini ishga soldi
Rossiya yetakchisi Uzoq Sharq bo‘ylab safari davomida ilk bor Yaponiya bilan uzoq yillik hududiy nizoga sabab bo‘lib kelayotgan Kuril tizmasining eng yirik oroli – Iturupga qadam ranjida qilgan.
Geostrategik jihatdan nozik hisoblangan ushbu hududda Saxalin viloyati gubernatori Valeriy Limarenko bilan o‘tgan uchrashuvda Putin rossiyaliklarda “g‘oliblik genetik kodi” borligini iddao qildi.
“Odamlarimiz shunday – g‘oliblik genetik kodi bor”, degan Putin hudud rahbari bilan uchrashuvda.
Mahalliy aholining “Hamma narsa g‘alaba uchun” degan shiorini ma’qullagan prezidentning bu gapi biologik atamalar orqali jamiyatni safarbar etish va hududiy da’volarga o‘ziga xos ritorik javob berish urinishi sifatida ko‘rinadi.
Biroq, siyosiy tahlilchilar va mutaxassislar “genetik kod” tushunchasining harbiy-siyosiy g‘oyalar va vatanparvarlik propaganda instrumentiga aylantirilishiga shubha bilan qarashadi.
Yaponiyaning hududiy e’tirozlariga qaramay amalga oshirilgan ushbu qadam va ortidan aytilgan balandparvoz bayonotlar Rossiyaning Sharqiy chegaralardagi o‘z mavqeyini namoyish etishga qaratilgan navbatdagi chaqirig‘i sifatida ko‘rilmoqda.
Iturupga tashrif Putinning 10-avgust kuni boshlangan Uzoq Sharq va Sibir bo‘ylab amaliy safari doirasida bo‘lib o‘tmoqda.
