Rossiyalik milliarderlar Putinning chaqirig‘idan so‘ng byudjetga $4,5 milliarddan ortiq “ixtiyoriy badal” o‘tkazib berdi
Deutsche Welle nashri rasmiy ma’lumotlarga tayanib xabar beradiki, 2026-yilning dastlabki yetti yarim oyida to‘plangan ushbu mablag‘ o‘tgan 2025-yil davomidagi jami tushum ko‘rsatkichidan (251,3 milliard rubl) 1,5 baravarga ko‘pdir. Taqdim etilgan xabarlarga ko‘ra, yirik tadbirkorlardan Ukrainadagi urushni moliyalashtirish uchun pul yig‘ish g‘oyasi “Rosneft” rahbari Igor Sechin tomonidan ilgari surilgan.
Bahorda o‘tkazilgan yopiq uchrashuvgacha nodavlat tashkilotlardan byudjetga bor-yo‘g‘i 15,6 milliard rubl kelib tushgan. Biroq muloqotdan so‘ng aprel oyining o‘zidayoq “xayriyalar” hajmi keskin ortib, 159,7 milliard rublga yetdi. Keyingi oylarda ham barqaror o‘sish kuzatilib, iyul va avgust oylarining birinchi yarmida tushumlar yana 30 foizga ko‘paydi.
Manbalarning ta’kidlashicha, tadbirkor Sulaymon Karimov uchrashuvning o‘zidayoq byudjetga to‘g‘ridan to‘g‘ri 100 milliard rubl o‘tkazish majburiyatini olgan. Vladimir Putin sanoatchilar va tadbirkorlar vakillari qarshisida qilgan chiqishida harbiy harakatlar davom ettirilishini ta’kidlab, biznes egalarini ushbu murakkab davrda davlatni moliyaviy qo‘llab-quvvatlashga chaqirgan.
