Rossiyada o‘pka vabosi haqida tarqalgan xabarlar tasdiqlanmadi. Bemorda noma’lum pnevmoniya aniqlandi
Rossiyaning Irkutsk viloyatidagi shifoxonada bemor ayol o‘pka vabosidan vafot etgani haqida xabarlar tarqalgan edi. Rospotrebnadzor (sanitariya-epidemiologik holat va yuqumli kasalliklar tarqalishini nazorat qiluvchi tashkilot) bu haqda Irkutskdagi Sibir va Uzoq Sharq o‘latga qarshi kurash instituti xodimasida kelib chiqishi noma’lum pnevmoniya aniqlanganini ma’lum qildi.
Xabarga ko‘ra, bemordan olingan namunalar kengaytirilgan tekshiruvdan o‘tkazilgan. Unda ayolning kasbiy faoliyati bilan bog‘liq mikroorganizmlar topilmagan. Institut xodimlari orasida so‘nggi 10 kun ichida yuqumli kasalliklar bo‘yicha murojaatlar qayd etilmagan. Biologik xavfsizlik qoidalariga rioya etilishini tekshirgan komissiya ham patogen mikroorganizmlar bilan ishlashda favqulodda holat aniqlamagan.
Bemor bilan aloqada bo‘lganlar aniqlanib, shifoxonada tibbiy kuzatuvga olingan va har kuni laboratoriya tekshiruvlaridan o‘tkazilgan. Natijada ikki kishida COVID-19, yana ikki kishida rinovirus infeksiyasi aniqlangan. Boshqa yuqumli kasalliklar qo‘zg‘atuvchilari topilmagan, aloqada bo‘lganlarning hech birida infeksiyaga xos sog‘liq o‘zgarishlari kuzatilmagan.
O‘zi nima bo‘lgan edi?
Rossiyaning Irkutsk viloyatidagi Shelexov tuman shifoxonasining statsionar bo‘limi bemorlardan birida o‘ta xavfli infeksiya borligi gumon qilingani sababli karantinga yopildi. Ayrim OAV bemor ayol o‘pka vabosidan vafot etganini yozmoqda, biroq Rossiya rasmiylari kasallik nomi va bemorning o‘limi haqida hozircha rasman ma’lumot bermagan.
Viloyat gubernatori Igor Kobzevning aytishicha, bemor bilan muloqotda bo‘lganlar tibbiy kuzatuvga olingan, ularda kasallik alomatlari aniqlanmagan. REN TV 189 kishi kuzatuv uchun kasalxonaga yotqizilganini xabar qilgan.
O‘zbekiston Sanepidqo‘mitasi vaziyatni Rossiya vakolatli idoralari va Jahon sog‘liqni saqlash tashkiloti manbalari orqali kuzatayotganini bildirdi. Mamlakatda o‘ta xavfli infeksiyalar kirib kelishi va tarqalishining oldini olish bo‘yicha xizmatlar tayyorgarligi kuchaytirilgan. Fuqarolardan tasdiqlanmagan xabarlarga ishonmaslik va ma’lumotni rasmiy manbalardan kuzatish so‘raldi.
Mazkur holat yuzasidan Sanitariya-epidemiologik osoyishtalik va jamoat salomatligi qo‘mitasi O‘zbekistonda tegishli xizmatlarning tayyorgarligi kuchaytirilganini ma’lum qildan edi.
