Rossiyada o‘pka vabosi haqida tarqalgan xabarlar fonida O‘zbekistonda kasallik tarqalishining oldini olish choralari kuchaytirildi
Rossiyaning Irkutsk viloyatidagi shifoxonada bemor ayol o‘pka vabosidan vafot etgani haqida xabarlar tarqalgan edi. Mazkur holat yuzasidan Sanitariya-epidemiologik osoyishtalik va jamoat salomatligi qo‘mitasi O‘zbekistonda tegishli xizmatlarning tayyorgarligi kuchaytirilganini ma’lum qildi.
Qo‘mitaning bergan bayonotida hozirda Rossiyaning vakolatli idoralari hamda Jahon sog‘liqni saqlash tashkilotining rasmiy manbalari orqali vaziyat muntazam ravishda kuzatib borilmoqda. Xususan, kasallik tashxisining laboratoriyada tasdiqlangan yoki tasdiqlanmagani, ehtimoliy yuqish manbai va yo‘llari, bemorning harakatlanish yo‘nalishi hamda u bilan muloqotda bo‘lgan shaxslarga oid ma’lumotlar o‘rganilmoqda.
Ayni vaqtda O‘zbekiston hududiga o‘ta xavfli yuqumli kasalliklarning kirib kelishi va tarqalishining oldini olish bo‘yicha tegishli xizmatlarning tayyorgarligi kuchaytirilgan.
Shuningdek, qo‘mita fuqarolardan turli xabarlarga ishonmaslik, ma’lumotlarni faqat rasmiy manbalar orqali kuzatib borish so‘rab qolgan.
Epidemiologik vaziyatda o‘zgarish yuz bergan taqdirda jamoatchilikka belgilangan tartibda qo‘shimcha axborot taqdim etiladi.
O‘zi nima bo‘lgan edi?
Rossiyaning Irkutsk viloyatidagi Shelexov tuman shifoxonasining statsionar bo‘limi bemorlardan birida o‘ta xavfli infeksiya borligi gumon qilingani sababli karantinga yopildi. Ayrim OAV bemor ayol o‘pka vabosidan vafot etganini yozmoqda, biroq Rossiya rasmiylari kasallik nomi va bemorning o‘limi haqida hozircha rasman ma’lumot bermagan.
Viloyat gubernatori Igor Kobzevning aytishicha, bemor bilan muloqotda bo‘lganlar tibbiy kuzatuvga olingan, ularda kasallik alomatlari aniqlanmagan. REN TV 189 kishi kuzatuv uchun kasalxonaga yotqizilganini xabar qilgan.
O‘zbekiston Sanepidqo‘mitasi vaziyatni Rossiya vakolatli idoralari va Jahon sog‘liqni saqlash tashkiloti manbalari orqali kuzatayotganini bildirdi. Mamlakatda o‘ta xavfli infeksiyalar kirib kelishi va tarqalishining oldini olish bo‘yicha xizmatlar tayyorgarligi kuchaytirilgan. Fuqarolardan tasdiqlanmagan xabarlarga ishonmaslik va ma’lumotni rasmiy manbalardan kuzatish so‘raldi.
