Rossiya shaxmatchilari va superyulduzlar Samarqanddagi Butunjahon olimpiadasida qatnashmaydi
Rossiya shaxmat federatsiyasi ijrochi direktori Aleksandr Tkachyovning ma’lum qilishicha, milliy terma jamoalarning musobaqadagi ishtirokiga qo‘yilgan taqiq FIDE prezidenti vazifasini bajaruvchi Vishvanatan Anand taklifi bilan kengash tomonidan tasdiqlangan. 2025-yil oxirida sanksiyalarni yumshatish taklifi berilgan bo‘lsa-da, 2026-yil boshida Yevropa mamlakatlari va Ukraina federatsiyalari e’tirozidan so‘ng iyun oyida rossiyalik shaxmatchilarga qo‘yilgan taqiq qayta tiklandi.
Tashkilotchilar uchun yana bir katta yo‘qotish – dunyoning yetakchi shaxmatchilarining turnirni o‘tkazib yuborishidir. Sayyoraning birinchi raqamli shaxmatchisi Magnus Karlsen (Norvegiya), reytingda yuqori o‘rinlarda turuvchi Hikaru Nakamura (AQSH) va Alireza Firuzja (Fransiya) ham O‘zbekistondagi Olimpiada tarkibiga kiritilmadi. Nakamura moliyaviy shartlar yetarli emasligini va yoshlarga yo‘l berishini aytgan bo‘lsa, Firuzja va Karlsen turli sabablarga ko‘ra o‘z terma jamoalari qaydnomasidan joy olmadi.
Shunga qaramay, Samarqand mezbonlik qiladigan 2026-yilgi Butunjahon shaxmat olimpiadasi musobaqa tarixidagi eng yirik va rekord darajadagi tadbir bo‘lishi kutilmoqda. 15-sentyabr kuni tantanali ravishda ochiladigan turnirda 400 ta jamoa (ochiq turnirda 208 ta, ayollar o‘rtasida 192 ta) Shveysarcha tizim bo‘yicha 11 tur davomida g‘oliblik uchun bahslashadi.
