Rossiya O‘zbekistonga 1,3 mln rubllik sport trenajyorlarini sovg‘a qildi
Petrozavodsk shahrida joylashgan va o‘z mahsulotlarini Yevropa, Osiyo hamda Yaqin Sharq mamlakatlariga eksport qiluvchi “MB Barbell” ishlab chiqaruvchisi tomonidan yuborilgan ushbu inventarlar jami 1 million 302 ming 515 rublga baholanmoqda. Kompleks jihozlar aholini ommaviy sportga jalb etish va ochiq maydonchalarda erkin shug‘ullanishini ta’minlashga qaratilgan.
Olib kelingan barcha trenajyorlar bevosita ko‘cha sharoitida foydalanishga mo‘ljallangan bo‘lib, xavfsizlik va foydalanish bo‘yicha zarur ko‘rsatmalar bilan ta’minlangan. Ularning texnik tuzilishi har xil yoshdagi fuqarolarga qulay va xavfsiz mashg‘ulot olib borish imkonini beradi.
Yetkazib berilgan zamonaviy sport uskunalariga ishlab chiqaruvchi tomonidan ikki yillik rasmiy kafolat berilgan. Shuningdek, xabarda ta’kidlanishicha, ushbu ochiq havoda foydalaniladigan trenajyorlarning umumiy xizmat qilish muddati yetti yilni tashkil etadi.
