Raqamlashtirishdan tortib yadro xavfsizligigacha. O‘zbekiston va Gruziya nimalarga kelishib oldi?
Muzokaralar doirasida ikki mamlakat delegatsiyalari o‘rtasida hamkorlikni yangi bosqichga olib chiquvchi qator hukumatlararo va idoralararo hujjatlar almashildi. Xususan, bojxona ishlarida o‘zaro yordam ko‘rsatish, AKT va raqamlashtirishni rivojlantirish hamda yuk tashuvlarini osonlashtiruvchi “E-Permit” ruxsatnomalar elektron tizimini joriy etish bo‘yicha muhim kelishuvlarga erishildi.
Tomonlar, shuningdek, oliy ta’lim, fan, innovatsiyalar, sog‘liqni saqlash, qishloq xo‘jaligi, turizm hamda atrof-muhitni muhofaza qilish yo‘nalishlarida hamkorlik memorandumlarini imzolashdi. Hujjatlar qatoridan ikki davlat hukumatlarining 2026-2027-yillarga mo‘ljallangan qo‘shma dasturi hamda Madaniyat vazirliklari o‘rtasidagi 2027-2030-yillarga qaratilgan uzoq muddatli rejalari o‘rin olgan.
Muzokaralarda ijtimoiy himoya va huquq-tartibot masalalari ham chetda qolmadi – mehnat migratsiyasi sohasida o‘zaro anglashuv memorandumi hamda radiatsiyaviy himoya va yadroviy xavfsizlik bo‘yicha axborot almashish kelishuvi tuzildi. Bundan tashqari, O‘zbekiston MIB va Gruziya Milliy ijro byurosi ham o‘zaro rasmiy hamkorlikni yo‘lga qo‘yadigan bo‘ldi.
